काठमाडौं I राष्ट्रिय मानव अधिकार आयोगले राष्ट्रिय स्वतन्त्र पार्टीका सभापति तथा पूर्व गृहमन्त्री रवि लामिछानेमाथि भएको घटनाको विषयमा प्रहरी उच्च अधिकारीहरूसँग जानकारी लिँदै अनुसन्धान अघि बढाएको छ।

आयोगका प्रवक्ता टिकराम पोखरेलका अनुसार सहकारी प्रकरणमा अनुसन्धानका क्रममा हिरासतमा रहेका लामिछानेलाई चितवनबाट कास्की लैजाने क्रममा प्रहरी महानिरीक्षकको आदेशमा अमानवीय व्यवहार गरी मानव अधिकार हनन् भएको उजुरी परेको थियो।

"घटनाको सत्यतथ्य पत्ता लगाउन आज प्रहरी अतिरिक्त महानिरीक्षक टेकबहादुर तामाङसहितका उच्च प्रहरी अधिकारीहरूसँग थप जानकारी लिइएको छ," प्रवक्ता पोखरेलले जानकारी दिए।

सो अवसरमा आयोगका सदस्य मनोज दुवाडीले कानुनी शासन, स्वच्छ पुर्पक्षको अधिकार, र बन्दीका आधारभूत मानव अधिकारलाई सम्मान गर्नुपर्नेमा जोड दिँदै निष्पक्ष र स्वतन्त्र अनुसन्धानको आवश्यकता रहेको बताए।

आयोगले निष्कर्षमा पुग्नका लागि प्रहरी महानिरीक्षक वसन्त कुँवरसँग समेत थप जानकारी लिने तयारी गरिरहेको छ। अनुसन्धानलाई तीव्रता दिइने प्रवक्ता पोखरेलले उल्लेख गरे।

प्रकाशित मिति: सोमवार, मंसिर २४, २०८१, ५:३१ बेलुका

लेखक: समाचारपाटी