काठमाडौं I भारतको कर्नाटक राज्यमा ह्यूमन मेटान्यूमो भाइरस (एचएमपीभी) को सङ्क्रमण पुष्टि भएको छ। नियमित स्वास्थ्य जाँचका क्रममा दुई जना बालबालिकामा एचएमपीभी सङ्क्रमण देखिएको छ। स्वास्थ्य मन्त्रालयलाई उद्धृत गर्दै बीबीसी हिन्दीले यो जानकारी दिएको हो।

सङ्क्रमित बालबालिकामध्ये तीन महिनाकी बालिका उपचारपछि घर फर्किसकेकी छिन् भने आठ महिनाको बालक अहिले बेङ्गलुरुको अस्पतालमा उपचाररत छन्। बालकको अवस्था स्थिर रहेको र उनलाई डाक्टरहरूको निगरानीमा राखिएको छ।

कर्नाटकको स्वास्थ्य मन्त्रालयले हालसम्म यो सङ्क्रमणलाई लिएर गम्भीर चिन्ता गर्नुपर्ने अवस्था नरहेको बताएको छ। केन्द्र सरकारले विशेष निगरानी र जाँचका लागि कुनै विशेष निर्देशन नदिएको मन्त्रालयले जनाएको छ। स्वास्थ्यमन्त्री दिनेश गुंडूले भारतमा पहिले पनि एचएमपीभी सङ्क्रमण देखिँदै आएको र बालबालिकाहरू यो भाइरसबाट प्रभावित हुने गरेको जानकारी दिनुभयो।

त्यस्तै, चीनमा पनि एचएमपीभी भाइरसको सङ्क्रमण तीव्र रूपमा फैलिरहेको छ। कोरोना भाइरस जस्तै लक्षण देखिने यो सङ्क्रमणबाट साना बालबालिका र कमजोर स्वास्थ्य भएका वृद्धवृद्धा तथा दीर्घरोगीहरू बढी जोखिममा रहेको बताइएको छ। चीनको रोग नियन्त्रण तथा रोकथाम केन्द्र (सीडीसी) ले यस भाइरसबाट सङ्क्रमितमा खोकी, ज्वरो, नाक बन्द हुने, र घाँटीमा समस्या देखिने लक्षणहरू रहेको जानकारी दिएको छ।

सन् २००१ मा पहिलो पटक फेला परेको एचएमपीभी भाइरस सबै मौसममा जीवित रहन सक्ने भए पनि चिसो मौसममा फैलिने सम्भावना बढी हुने चिकित्सकहरूले बताएका छन्।

स्वास्थ्यकर्मीहरूले ब्रोन्काइटिस र निमोनिया जस्ता गम्भीर समस्या हुनसक्ने चेतावनी दिँदै, सतर्कता अपनाउन आग्रह गरेका छन्।

एचएमपीभीभारतको कर्नाटकमा पनि एचएमपीभी भाइरसको सङ्क्रमण

प्रकाशित मिति: सोमवार, पुस २२, २०८१, ५:५९ बेलुका

लेखक: समाचारपाटी