जनकपुरधाम । दाइजो कसूरका आरोपित डा. पंकज चौधरीलाई तीनलाँख रुपैयाँ धरौटीमा थुनामुक्त गर्न उच्च अदालत जनकपुरले आदेश दिएको छ । जिल्ला अदालत महोत्तरीले पूर्वपक्षका लागि जेल चलान गरेका चौधरीलाई उच्च अदालत जनकपुरले राहत दिँदै धरौटीमा छोड्न आदेश दिएको हो ।

उच्च अदालत जनकपुरको इजलास नम्बर ३ का न्यायाधीशद्वय विष्णु कोइराला र रामेश्वर रेग्मीको संयुक्त इजलासले बिहीबार धरौटी लिएर थुनामुक्त गर्न आदेश दिएको रजिष्टार खड्गराज अधिकारीले जानकारी दिनुभयाे । दाइजोसम्बन्धी कसूरमा महोत्तरीको रामगोपालपुर नगरपालिका ५ का पंकज २२ पुसमा जिल्ला अदालत महोत्तरीको आदेशमा पुर्पक्षका लागि जेल चलान भएका थिए ।

दाइजोका कारण घरेलु हिंसामा परेको भन्दै पंकजकी पत्नी महोत्तरीकी औरही नगरपालिका १ माइत भएकी २१ वर्षीया नेहा चौधरीले मुद्दा दायर गर्नुभएकाे थियाे । तीन वर्षको प्रेमपछि २५ फागुन २०७८ मा नेहा र पंकज बीच सामाजिक परम्पराअनुसार जनकपुरधामको राजदरबार होटेलमा विवाह सम्पन्न भएको थियो ।

नेहाले दाइजोमा पंकजले काठमाडौंमा घर किनिदिन भन्दै आफूलाई यातना दिइरहेको आरोप लगाउँदै आउनुभएकाे छ । पंकजले भने आफूमाथि लगाएको आरोप निराधार रहेको दावी गर्दै आएकाे प्रहरीले बताएकाे छ । विवाहको चार महिना पछि दुबैबीच मनमुटाव उत्पन्न भएको थियो ।

दाइजोसम्बन्धीको कसुरमा मुद्दा परेपछि फरार रहेका पंकजका बुबा ६० वर्षीय रामप्रवेश चौधरी पनि पुर्पक्षका लागि गत फागुन ३० गत जलेश्वर जेल सजाए भएकाे थियाे । चौधरी अहिले थुनामै रहेकाे प्रहरीले जनाएकाे छ ।

annapurnapost

उच्च अदालत जनकपुरडा.पंकज चौधरीधरौटी

प्रकाशित मिति: शुक्रबार, चैत्र १०, २०७९, १२:११ बेलुका

लेखक: समाचारपाटी