गुल्मी । गुल्मीमा तीन युवा मिलेर खानेपानी उद्योग खोलेका छन् । उद्योगमा उनीहरूले करिब २ करोड रुपैयाँ लगानी गरेका छन् । रेसुङ्गा नगरपालिका–३ बेहोरेस्थित छल्दी खोला किनारमा उनीहरूले रेसुङ्गा जल उद्योग प्रालि सञ्चालनमा ल्याएका हुन् ।रेसुङ्गा–२ का विश्वास पुन, ३ का सन्तोष कुँवर र ६ का राम पन्थी मिलेर पानी उद्योग सञ्चालन गर्नुभएकाे हाे । कुँवर सिभिल इन्जिनियर र पन्थी मेकानिकल इन्जिनियर हुनुहुन्छ ।

रेसुङ्गा काखमा रहेको मूलबाट प्रशोधन गरी खानेपानी बिक्री वितरण थालिएको अध्यक्ष कुँवरले बताउनुभयाे । प्रतिघण्टा २ हजार लिटर पानी उत्पादन क्षमताको उद्योगले अहिले १ हजार ४ सय लिटर उत्पादन गरिरहेको छ । उद्योगबाट १ लिटर, आधा लिटर र २० लिटर जारमा पानी बजार पठाउने गरिएको सञ्चालक पन्थीले बताउनुभयाे । पानी गुल्मीभरि पठाउन थालिएको उहाँले बताउनुभयाे ।

उद्योगका अनुसार जिल्लाको माग पूरा भएपछि अन्य जिल्ला पठाइने छ । प्रतिबोतल २० रुपैयाँ खुद्रा मूल्य तोकिएको छ । चिनियाँ प्रविधियुक्त स्वचालित उद्योगमा स्थानीय १५ जनाले प्रत्यक्ष रोजगारी पाएका छन् ।

पछिल्लो समय जिल्लामा साना–ठूला उद्योग बन्द हुने अवस्थामा पुगेका बेला तीन युवाले आँट गरेर पानी उद्योग सञ्चालनमा ल्याएपछि जिल्लामा उद्योग–व्यवसायमा सम्भावना देखिएको गुल्मी उद्योग वाणिज्य संघ अध्यक्ष ईश्वरीप्रसाद पौडेलले बताउनुभयाे ।

खानेपानी उद्योगगुल्मी

प्रकाशित मिति: बिहिबार, पुस २५, २०८१, २:१७ बेलुका

लेखक: समाचारपाटी