काठमाडौं I ग्लोबल आइएमई बैंक लिमिटेडले आफ्ना ऋण लगानीकर्ताको उत्पादनलाई बजारीकरणमा सहजीकरण गर्ने उद्देश्यले ‘ग्लोबल हाट बजार’ सञ्चालनमा ल्याएको छ।

बैंकका प्रमुख कार्यकारी अधिकृत सुरेन्द्रराज रेग्मीले काठमाडौँको कमलादी शाखामा शुक्रबार हाट बजारको उद्घाटन गरेका छन्। रेग्मीका अनुसार यो हाट बजारले दिगो र हरित अर्थतन्त्र निर्माणमा योगदान पुर्‍याउने लघु, साना तथा मझौला उद्यमीका उत्पादनलाई बजारमा पहुँच विस्तार गर्ने लक्ष्य राखेको छ।

“हाट बजारले अर्गानिक, रैथाने र स्थानीय उत्पादनलाई प्रोत्साहन गर्ने मात्र नभई नेपाली उद्यमीलाई हौसला प्रदान गर्नेछ,” रेग्मीले उद्घाटन समारोहमा भने।

हाट बजारमा विषादी रहित कृषि उत्पादन, रैथाने बाली, स्थानीय स्रोतबाट बनेका हस्तकला सामग्री, सजावटका बिरुवा जस्ता सामग्री प्रदर्शन र बिक्रीका लागि राखिनेछ।

ग्लोबल आइएमई बैंकले यो अभियानलाई लघु, साना तथा मझौला उद्यमको प्रवद्र्धनमा महत्वपूर्ण कदमको रूपमा चित्रण गरेको छ। रेग्मीले बैंकका ऋणीका उत्पादन खपत र प्रवद्र्धन गर्नु बैंकको सामाजिक जिम्मेवारी रहेको बताए।

ग्लोबल आइएमई बैंक ७७ वटै जिल्लामा सेवा प्रदान गर्दै आएको निजी क्षेत्रको पहिलो वाणिज्य बैंक हो। ३५४ शाखा, ३८४ एटिएम, २३७ शाखारहित सेवा, ६८ एक्सटेन्सन काउन्टरसहित १,१०० भन्दा बढी सेवा केन्द्रमार्फत बैंकले आफ्ना ग्राहकलाई सेवा दिइरहेको छ।

बैंकले २०२४ का लागि ‘ग्लोबल फाइनान्सको बेष्ट बैंक अवार्ड’ र ‘युरो मनी अर्वाड फर एक्सलेन्स’ सहित थुप्रै राष्ट्रिय तथा अन्तर्राष्ट्रिय पुरस्कार प्राप्त गरेको छ। साथै, बैंकले अमेरिका, क्यानडा, अस्ट्रेलिया, खाडी मुलुक लगायतका देशबाट रेमिट्यान्स सेवा प्रदान गर्दै आएको छ।

ग्लोबल हाट बजारको सुरुवातले नेपाली उत्पादनलाई बजारीकरण गर्दै उद्यमशीलतालाई नयाँ उचाइमा पुर्‍याउने विश्वास गरिएको छ।

ग्लोबल आइएमई बैंक लिमिटेडग्लोबल हाट बजार

प्रकाशित मिति: सोमवार, पुस ८, २०८१, १:०० बेलुका

लेखक: समाचारपाटी