काठमाडौं I ग्लोबल आइएमई बैंक लिमिटेडले राष्ट्रिय फोटोपत्रकार समूह नेपाल (एनएफपिजे) का सदस्यहरूलाई क्यामरा खरिदका लागि विना धितो कर्जा उपलब्ध गराउने भएको छ।

बैंकका हेड ट्रान्जेक्सन बैंकिङ विभागका प्रमुख प्रकाश पौडेल र एनएफपिजेका अध्यक्ष प्रदीपराज वन्तबीच सम्झौता पत्रमा हस्ताक्षर भएसँगै बैंकले फोटो पत्रकारहरूलाई रु २ लाखदेखि ५ लाखसम्मको कर्जा प्रवाह गर्ने समझदारी भएको हो।

सहज किस्ताबन्दी सुविधासहित ६ महिनादेखि १८ महिनासम्मको अवधिमा कर्जा भुक्तानी गर्न सकिनेछ। इच्छुक फोटो पत्रकारहरूले आवश्यक कागजात तथा आवेदन फारम एनएफपिजेको सिफारिससहित बैंकमा पेश गर्नुपर्नेछ।

ग्लोबल आइएमई बैंकले हालै ग्लोबल फाइनान्सको ‘बेष्ट बैंक अवार्ड २०२४’ तथा ‘युरो मनी अवार्ड फर एक्सलेन्स २०२४’ प्राप्त गर्दै नेपालको सर्वश्रेष्ठ बैंकको रुपमा सम्मानित भएको छ।

सातै प्रदेश तथा ७७ वटै जिल्लामा आफ्नो सेवा विस्तार गरिसकेको बैंकले ३५५ शाखा कार्यालय, ३८५ एटीएम, २३७ शाखारहित बैंकिङ सेवा, ६९ एक्सटेन्सन तथा राजस्व संकलन काउन्टर र ३ वटा वैदेशिक प्रतिनिधि कार्यालयमार्फत आफ्ना ग्राहकलाई सेवा दिँदै आएको छ।

बैंकले नेपालभित्र मात्र नभई संयुक्त राज्य अमेरिका, क्यानडा, अस्ट्रेलिया, कोरिया, जापान, साउदी अरब, कतार, यूएई, भारत लगायतका देशहरूबाट पनि रेमिट्यान्स सेवा उपलब्ध गराउँदै आएको छ।

प्रकाशित मिति: बिहिबार, माघ २४, २०८१, ५:०३ बेलुका

लेखक: समाचारपाटी