नेपाली काँग्रेसका महामन्त्री गगनकुमार थापाले काँग्रेसले एक वर्ष बालुवाटार र सिंहदरबारतिर फर्किएर हेर्न नहुने बताउनुभएको छ ।

सोमवार कैलालीमा आयोजित एक कार्यक्रममा बोल्दै उहाँले यस्तो बताउनुभएको हो । उहाँले काँग्रेसले २०८१ सालमा बालुवाटार र सिंहदरबार नहेरीकन जनताको काममा ध्यान दिनुपर्ने बताउनु भयो । उहाँले ०८१ सालमा सरकार बनाउने खेलमा काँग्रेस लाग्नु नहुने बताउनु भयो । उहाँले एक वर्ष नेकपा एमालेसहित नेकपा (माओवादी केन्द्र) र अन्य नयाँ राजनीतिक दलहरुलाई सत्ता सञ्चालन गर्न दिनुपर्ने बताउनु भयो । उहाँले सरकारमा नयाँ आएकाहरुले काँग्रेसले सरकार छोड्यो अब चमत्कार हुन्छ भन्ने जस्ता भ्रम छरिरहेको बताउनुभएको हो । राष्ट्रिय स्वतन्त्र पार्टीका सभापति एवं उपप्रधान तथा गृहमन्त्री रवि लामिछानेप्रति लक्षित गर्दै आफू नेता हुनासाथ, प्रधानमन्त्री र मन्त्री हुनासाथ सबै काम जादुगर झैँ सक्छु भन्ने भ्रमबाट मुक्त हुनुपर्ने बताउनु भयो । उहाँले सहकारीले ठगेको रकम फिर्ता गरेर पीडितमाथि न्याय दिनुपर्ने जिम्मेवारी रहेको बताउनु भयो । 
उहाँले भन्नुभयो, ‘अहिले नयाँ आएका सरकारका साथीहरुले जताततै अब चमत्कार हुन्छ, अस्तिसम्म काँग्रेस भएकाले नभएको हो, अब काँग्रेस गयो, राम्रो हुन थाल्यो भन्ने छ । त्यो बेकारको कुरा हो । हामी हावादारी कुरा गरिरहेका छौँ नि । म नेता, प्रधानमन्त्री हुनासाथै, म आउनासाथै म जादुगर हो, मैले अब जादु गर्छु । अब म कतार, मलेसिया, सबैको स्टिकर टाँसेर नेपाल ल्याउँछु भनेर अर्को फेरि आयो । हामी देको देइ गर्न थाल्यौँ क्या । २०८१ साल एक वर्ष नेपाली काँग्रेसले बालुवाटारतिर हेर्दै नहेरोस् । बालुवाटार आयो की आँखा चिम्म गरेर अघि गइहाल्यौँ । महाराजगञ्जतिर गइहाल्ने । हेर्दै नहेर्ने । सिंहदरबारतिर पनि हेर्दै नहेर्ने । एक वर्ष ०८१ माओवादी, एमाले साथीहरु मिलेर सरकार चलाउन दिनुस् । चलाउनुस् । मल कारखाना खोल्छु भन्नेकुरा नेताले आएर दिने गफ हो यो, यसलाई नपत्याउनु होला । धेरै साथीहरुले अर्बौं रुपैयाँ पैसा सहकारीमा लगेर जम्मा गर्नुभएको छ । सहकारीले कयौँ राम्रा काम गरेका छन् । तर केही मानिसहरुले सहकारीको रकमको यति दुरुपयोग गर्ने अवस्था बन्यो । जसको कारणले हजारौँ मानिसहरु सडकमा आइपुगेका छन् । ति मानिसहरुलाई न्याय गर्नुपर्नेछ, फिर्ता गर्नुपर्नेछ । न्यायको आवाज हामी बन्नुपर्छ । काँग्रेस, एमाले, माओवादी भन्दिनँ । हामी दुई महिना अघिसम्म सरकारमा थियौँ, सकेनौँ नि त ।’महामन्त्री थापाले नागरिकहरुको न्यायको लागि काँग्रेसले आवाज उठाउने बताउनु भयो ।

—न्युज एजेन्सी नेपाल

नेपाली काँग्रेसमहामन्त्री गगनकुमार थापा

प्रकाशित मिति: मङ्लबार, बैशाख ४, २०८१, १०:३१ बिहान

लेखक: समाचारपाटी