काठमाडौं । ग्याँस सिलिण्डर विस्फोट हुँदा नेपाली कांग्रेसका नेता एवम् सांसद चन्द्र भण्डारी र उहाँकी ८६ वर्षीया आमा घाइते हुनुभएकाे छ । काठमाडौंको बुद्धनगरस्थित भण्डारीको निवासमा गएराति ग्याँस सिलिण्डर विस्फोट भएको थियो ।

राति खाना खाइवरी सुतेको बेला सिलिण्डर विस्फोट हुँदा भण्डारी र उहाँकी आमा घाइते भएको उहाँको पारिवारिक स्रोतले बताएकाे हाे । उहाँहरु दुवैको जनाकाे कीर्तिपुरस्थित बर्न अस्पतालमा उपचार भइरहेको छ ।

उपचारमा संलग्न डाक्टर किरण नकर्मीका अनुसार सांसद भण्डारीको शरीरको ३० प्रतिशत र उहँकी आमाको ७० प्रतिशत भाग जलेको छ ।

उहाँका अनुसार दुवै जनालाई आईसीयूमा राखेर उपचार भइरहेको छ । 'दुवैलाई गम्भीर जलन छ । सांसदज्यूको शरीरको ३० प्रतिशत र आमाको शरीरको ७० प्रतिशत भाग जलेको छ । बन्द कोठामा दुर्घटना भएकाले तातो धुवाँ र तातो ग्यास स्वास नलीमा पसेका कारण अवस्था अझै जटिल बनेको छु, डाक्टर नकर्मीले भन्नुभयाे, ''हामीले आईसीयुमै राखेर उपचार गरिरहेका छौँ ।''

उहाँले शरीरको धेरै भाग जलेको र उमेर पनि धेरै भएका कारण आमाका अवस्था झनै गम्भीर रहेको बताउनुभयाे । यद्पि अहिलेसम्म दुवै जना बोल्न सक्ने अवस्थामा रहेको डाक्टर नकर्मीले जानकारी दिनुभयाे । ''बोल्न सक्ने अवस्थामा हुनुहुन्छ । तर जलन धेरै भएको हुँदा स्वाप्रस्वासमा समस्या आउन सक्छ । अक्सिजन दिएर राखिएको छ,'' उहाँले भन्नुभयाे ।

उहाँले दुवै जनाको उपचार भइरहेको र यसै होला भन्न सकिने अवस्था नरहेको बताउनुभयाे । ''यस्तै होला भनेर किटान गर्न सकिँदैन । भएका सबै साधन स्रोत प्रयोग गरेर बचाउने कोसिस हुन्छु, उहाँले भन्नुभयाे ।

डाक्टर नकर्मीले यहाँ उपचार सम्भव नभए भारतको मुम्बई रेफर गर्न सकिने सम्भावना रहेको बताउनुभयाे । 'हाम्रो भन्दा अझै राम्रो उपचार पद्धति भारतको मुम्बईमा छ । त्यो विकल्पबारे सोचिरहेका छौँ । अहिले फेरि एकपटक बिरामीको मूल्याङ्कन गरेर त्यसबारे निर्णय लिनेछौँ', उहाँले भन्नुभयाे ।

source:-shilapatra

ग्याँस सिलिण्डर विस्फोट

प्रकाशित मिति: बिहिबार, फाल्गुन ४, २०७९, ९:२८ बिहान

लेखक: समाचारपाटी