रुसी सेनामा भर्ती भएका व्यक्तिहरुको परिवारले परराष्ट्रमन्त्री डा. नारायणप्रकाश साउदलाई भेटेको छन् । मंगलवार परराष्ट्र मन्त्रालयम सिंहदरबारमा रुसी सेनामा भर्ती भएका व्यक्तिहरुको परिवारले भेट गरेका हुन् । सेनामा भर्ती भएर जीवित रहेका, बेपत्ता भएका, बन्धक बनाइएका र मृत्यु भएका परिवारका सदस्यहरुले परराष्ट्रमन्त्रीलाई आफन्त फिर्ता ल्याइदिन आग्रह गरेका छन् । पीडित परिवारसँगको भेटमा मन्त्री साउदले परिवारका सदस्यलाई भर्ती गराउने एजेन्ट तथा म्यानपावरको विवरण उपलब्ध गराइदिन अनुरोध गर्नुभयो । अहिलेसम्म करिव २४४ जनाको परिवारको सदस्यले आफ्ना व्यक्तिहरु नेपाल फर्काइ पाउँ भनेर निवेदन दिएको जानकारी दिनुभयो । 

परराष्ट्रमन्त्रीसँगको भेटवार्तामा पुग्नुभएका गोरखाकी कविता कुमालले सरकारले दिएको आश्वासन छिट्टै पूरा गर्न अनुरोध गर्नुभयो । यस्तै अर्का आफन्त श्रेया श्रेष्ठले श्रीमान रुसी सेनामा भर्ती भइसकेपछि भागेर आउन खोज्दा रुसी सेनाले पक्रेर पहिलाकै ठाउँमा राखेको बताउनु भयो । रुसी सेनामा भर्ती भएका व्यक्तिहरुका परिवारले सरकारले छिटो भन्दा छिटो आफन्तहरुलाई नेपाल फिर्ता ल्याउन आग्रह गरेका छन् । 

रुसी सेनामा भर्ती भएकाको यकिन संख्या सरकारले आजसम्म पनि दिएको छैन । सरकारले यकिन संख्या उपलब्ध गराउन नसक्दा सरकारकै आलोचना भइरहेको छ । साथै सरकारले रुस सरकारसँग कुटनीतिक पहल गर्न नसकेको आरोप सरकारमाथि लाग्ने गरेको छ । सरकारले रुसी सेनामा भर्ती नहुन आग्रह गरेको भएपनि विभिन्न ठगीमा परि नेपालीहरु रुसी सेनामा भर्ती भएका छन् । उनीहरुलाई स्वदेश फर्काउन रुस सरकारसँग सरकारले पहल गरेको भएपनि सफल हुन सकेको छैन । विगत दुई वर्षदेखि रुस—युक्रेन युद्ध जारी छ ।

— न्युज एजेन्सी नेपाल

परराष्ट्रमन्त्रीरुसी सेना

प्रकाशित मिति: बुधबार, फाल्गुन १६, २०८०, १२:४६ बेलुका

लेखक: समाचारपाटी