पेरिस । ब्राजिलियन महान् फुटबलर पेलेको निधनपछि फ्रेन्च फरवार्ड किलियान एम्बाप्पेले दु:ख व्यक्त गर्नुभएको छ । लामो समयदेखि क्यान्सरसँग जुधिरहनुभएका पेलेको ८२ वर्षको उमेरमा गए राति ब्राजिलको साओ पाउलोमा निधन भएको थियो।
पेलेलाई एकदमै धेरै सम्मान गर्नेमध्ये एक एम्बाप्पले उहाँका थुप्रै कीर्तिमान पनि तोड्नुभएको छ। गत विश्वकपमा आफ्नो कीर्तिमान तोडेपछि पेलेले एम्बाप्पेलाई अस्पतालबाटै बधाईसमेत दिनुभएको थियो।
उहाँको निधन पश्चात एम्बाप्पले ट्वीटमा लेख्नुभएको छ 'फुटबलमा राजाले हामीलाई छाडे, तर उहाँको विरासत कहिल्यै बिर्सिइने छैन।'
पेलको निधनपछि अर्जेन्टाइन कप्तान लियोनेल मेसी, पोर्चुगिज कप्तान क्रिस्टियानो रोनाल्डोलगायत विश्वभरका फुटबलर तथा प्रतिष्ठित व्यक्तित्वहरूले पनि समवेदना प्रकट गरिरहेका छन्।
पेलेले सन् १९५८, १९६२ र १९७० मा ब्राजिललाई विश्वकप जिताउनुभएको थियो। उहाँ तीन फिफा विश्वकप जित्ने एक मात्रै खेलाडी हुनुहुन्छ।