पोखरा । पोखरा महानगरपालिका वडा नं. १७ तल्लो बिरौटामा अवस्थित फिस्टेल एकेडेमीमाध्यमिक विद्यालयले आयोजना गरेको ‘फिस्टेल स्पोर्टस् फेस्ट’ अन्तर्गत उद्घाटनपूर्वका खेलहरूबाट ६ विद्यालय अर्को चरणका लागि छनोट भएका छन् । सहभागी विद्यालय धेरै रहेकाले उद्घाटनपूर्व नै दुई दिन प्रथम चरणका खेलहरू सञ्चालन हुने कुरा विद्यालयले जानकारी गराएको छ ।

विद्यालय स्थापनाको २९ औँ वार्षिकोत्सवको अवसरमा विद्यालयले यहीपुस पाँचदेखि सात गतेसम्म विभिन्न विद्यालयहरूलाई समेटेर खेलकुद कार्यक्रम सञ्चालन गरिरहेको छ । मङ्गलबार भएका खेलहरूमा अक्सफोर्ड र शान्तिनिकुञ्ज स्कुलबिच भएको खेलमा टाई ब्रेकरमा ३÷२ गोलसहित शान्तिनिकुञ्ज स्कुलले जित हासिल गरेको छ । यसैगरी दोस्रो खेलमा बालकल्याण र युनिभर्स स्कुलबिच भएको खेलमा २÷० गोलसहित बालकल्याण स्कुल अगाडि बढ्दा विन्ध्येश्वरीलाई शुन्यका विरुद्ध चार गोल गरी कालिकाले आफ्नो यात्रा सुरक्षित राखेको छ ।

शिशुकल्याण र बालोदयबिच भएको खेलमा बराबरी ४÷४ गोल भएपछि टाई ब्रेकरबाट ३÷२ गोलसहित शिशुकल्याणले स्थान सुरक्षित गर्यो । यसैगरी१४ वर्षमुनिको लन टेनिसतर्फ भएका पहिलो चरणका खेलमा गण्डकीबोर्डिङ स्कुलका प्रफुल श्रेष्ठले फिस्टेल एकेडेमीका प्रसिद्ध पराजुलीलाई ६–०, ६–१ को सोझो सेटले पराजित गरी आफ्नो यात्रा सुरक्षित राखे । यस्तै १२ वर्षमुनिको दोस्रो खेलमा फिस्टेल एकेडेमीका सुवान के.सीले फिस्टेल एकेडेमीकै जेनिश ढकाललाई ६–१, ६–१ को सोझो सेटमा पराजित गरे । यसैगरी १६ वर्षमुनिको तेस्रो खेलमा फिस्टेल एकेडेमीका सृजन भट्टराईले गण्डकी बोर्डिङ स्कुलका प्रफुल श्रेष्ठलाई ६–०, ६–० को सोझो सेटमा पराजित गरे ।

हेम्जा बोर्डिङ स्कुल र पोखरा स्पाइरलबिचको खेलमा हेमजा बोर्डिङ स्कुलले उपस्थिति नजनाएपछि पोखरा स्पाइरल अगाडि बढेको छ भने भद्रकालीर छोरेपाटन स्कुलको खेलमा पनि भद्रकाली स्कुल सहभागी नभएपछि छोरेपाटन मावि स्वतः अर्को चरणमा छनोट भएको छ । बुधबार पनि फुटबलका छ खेलहरू, बास्केटबल छात्रछात्रा र लन टेनिसका विभिन्न खेलहरू सञ्चालन हुने कुरा विद्यालयका सहप्राचार्य कमल लामिछानेले जानकारी गराउनुभयो ।

खेलकुद कार्यक्रममा फुटबलतर्फ २८ स्कुल सहभागी रहेका छन् भने छात्रछात्रा बास्केटबल र लन टेनिसका खेलहरू पनि रहेका छन् । फुटबल तथा बास्केटबल खेलमा प्रथम, द्वितीय र तृतीय हुने विद्यालयले क्रमशः ७५ हजार, ३५ हजार र २० हजार नगद पुरस्कारका साथमा ट्रफी, मेडल र प्रमाणपत्र प्राप्त गर्ने कुरा विद्यालयका संस्थापक अध्यक्ष चिनु रानाभाटले जानकारी दिनुभयो ।

फिस्टेल स्पोर्टस् फेस्ट

प्रकाशित मिति: बुधबार, पुस ४, २०८०, १:०५ बेलुका

लेखक: समाचारपाटी