काठमाडौं । बलिउड अभिनेत्री, फेशन आइकन तथा टेलिभिजन पर्सनालिटी मलाइका अरोरा बिहीबार काठमाडौं आइपुगेकी छन् । नेपाल रत्न तथा आभूषण संघले आयोजना गर्न लागेको फेशन रनवेमा शो स्टपरको रुपमा भाग लिन मलाइका नेपाल आउनुभएकाे हाे ।
मुम्बईबाट बिहान १० बजे त्रिभुवन अन्तर्राष्ट्रिय विमानस्थलमा अवतरण गरेकी मलाइका लगत्तै होटल याक एण्ड यति पुग्नुभएकाे थियाे । जहाँ उहाँले संक्षिप्त मिडिया वार्तालाप समेत गर्नुभयाे ।
मलाइकालाई उहाँको नेपाल आगमन, योजना र फेशनबारे पत्रकारहरूले केही प्रश्न राखेका थिए । जवाफमा मलाइकाले आफूलाई नेपाल आउन पाउँदा खुसी लागेको बताउँदै निम्तोका लागि धन्यवाद समेत दिनुभयाे । यसअघि पनि नेपाल आउनुभएकाे उहाँले यसपटकको बसाइमा नेपालबारे थप बुझ्ने इच्छा रहेको बताउनुभयाे ।
यसपटकको नेपाल बसाइ छोटो हुने तर अधिकांश समय उक्त इभेन्टमा बताउने मलाइकाको भनाइ छ । ‘छोटो हुनेछ बसाइ तर मेरो अधिकांश समय यहीं बित्नेछ,’ उहाँले भन्नुभयाे, ‘नेपाल बसाइमा यहाँको फेशन, संस्कृति, फिल्म, संगीतबारे धेरै कुरा बुझ्ने प्रयास गर्नेछु ।’
रत्न तथा आभूषण प्रदर्शनीको हिस्सा बन्न पाउँदा खुसी लागेको भन्दै मलाइकाले नेपाली गहना र फेसन लगाउने अवसर पाउँदा निकै हर्षित भएको बताउनुभयाे । नेपाली रत्न तथा आभूषणलाई विश्वमाझ चिनाउने उद्देश्यले तीन दिने एक्स्पो आयोजना गरिएको हो । बिहीबार बेलुका हुने एक्स्पो शुभारम्भ समारोहको फेशन रनवेमा मलाइका शो स्टपर हुनेछ भने नेपाली मोडलहरुले र्याम्प नाप्नेछन् । तीन दिनसम्म चल्ने एक्स्पोमा सर्वसाधारणले निःशुल्क प्रवेश पाउने जनाइएको छ ।
source:-onlinekhabar