बारा । केराको बोट सुक्ने रोग लागेपछि निजगढ नगरपालिकाको सिंगौलका केरा खेती गर्ने कृषकहरु चिन्तित बनेका छन्। केराको पात पहेँलो हुने बोटसमेत सुकेर मर्न थालेपछि स्थानीय किसानहरूमा चिन्ता बढ्न थालेको हो।

रोग लागेर बोट सुक्न थालेपछि भर्खर पसाएको केराको काइँयोमा समेत साना कोसा लाग्ने र नसप्रिने समस्या देखिएको किसानहरूले बताएका छन्। यो रोग पहिलेदेखि केरा खेती गरिएको जमिनमा कम देखिएको भए पनि नयाँ खेतीमा भने प्रकोपको रूपमा देखा परेको किसानहरूले बताउनुभयो ।

रोग लागेर केरामा क्षति भए पनि लगानीसमेत नउठ्ने देखेर किसानहरू चिन्तित बनेका छन्। परम्परागत खेती गर्दै आएका सिंगौलका अधिकांश किसानहरू केही वर्षदेखि केरा खेतीतर्फ आकर्षित बनेका थिए।

सिंगौलमा हाल ८५ प्रतिशत किसानले केरा खेती गर्दै आएका छन्। केही किसानहरूले भने अर्का जमिन भाडामा लिएर पनि केरा खेती गर्दै आएका छन्। उनीहरुले प्रतिकट्टा ५ देखि ७ हजारसम्म वार्षिक रकम तिरेर खेती गर्दै आएको स्थानीय रामबाबु बुढाथोकीले बताउनुभयो।

प्रकाशित मिति: बिहिबार, माघ १९, २०७९, १२:०० बेलुका

लेखक: समाचारपाटी