धनगढी । जंगली जनावरका लागि खेतमा थापेको विद्युतीय धरापमा परेर कैलालीको धनगढीमा एक महिलाको मृत्यु भएको छ । मृत्यु हुनेमा धनगढी–३ बस्ने अन्दाजी ३२ वर्षीया मञ्जु कुँवर रहेको जिल्ला प्रहरी कार्यालयका प्रहरी निरीक्षक सन्तोष बस्यालले जानकारी दिनुभयाे ।

धनगढी उपमहानगरपालिका–३ स्थित होल्डिङ सेन्टर नजिकै सोमबार राति करीब ११ बजेतिर उहाँ विद्युतीय धरापमा पर्नुभएकाे थियाे । विद्युतीय धरापमा परी गम्भीर घाइते हुनुभएकाे कुँवरलाई उपचारका लागि माया मेट्रो अस्पताल लगिएको थियाे। कुँवरलाई चिकित्सकले मृत घोषणा गरेको प्रहरी निरीक्षक बस्यालले बताउनुभयाे । उहाँको शव सेती प्रादेशिक अस्पतालमा राखिएको छ ।

जंगली जनावरबाट धानबाली जोगाउन भन्दै खेतको आलीमा स्थानीय ४८ वर्षीय जंगलिया चौधरीले करेन्ट प्रवाह गरेको र त्यही करेन्ट लागेर मञ्जु कुँवरको मृत्यु भएको प्रहरीको भनाइ छ ।

प्रहरीले खेतमा विद्युतीय धराप राखेका जंगलिया चौधरीलाई पक्राउ गरेको छ । चौधरीले जंगली जनावरबाट धानबाली जोगाउन करेन्ट छाडेको बयान दिएको प्रहरीले जनाएको छ ।

onlinekhabar

जंगली जनावरविद्युतीय धराप

प्रकाशित मिति: मङ्लबार, भदौ १९, २०८०, ८:०८ बिहान

लेखक: समाचारपाटी