गीताञ्जली साहित्य परिवार र विश्व हिन्दू महासंघ कास्कीको आयोजनामा एकता रचनावाचन सम्पन्न

जरोटुप्पो संरक्षण साहित्य समाज नेपालको संयोजनमा गीताञ्जली साहित्य परिवार र विश्व हिन्दू महासंघ कास्कीको आयोजनामा एकता रचनावाचन कार्यक्रम सम्पन्न भएको छ । ३०१ औं राष्ट्रिय एकता दिवसको पूर्व सन्ध्यामा विगतका वर्ष जस्तै मंगलवार बिहान उक्त कार्यक्रम सम्पन्न भएको हो ।

कार्यक्रममा बोल्दै एकता दिवस मूल समारोह समितिका संयोजक शंकर खरालले विगतका वर्षमा जस्तै जनस्तरबाट मूल समारोह आयोजना गरिएको बताउनुभयाे । जनस्तरको आवाजकै कारण सरकारले कटौती गरेको एकता दिवसको विदालाई पुनः शुरु गर्नुलाई प्राप्तिका रुपमा लिन आग्रह गर्नुभयाे । साथै उहाँले रचनावाचनमा सहभागी कवि कलाकारलाई मूल समारोहमा प्रमाणपत्र प्रदान गरिने जानकारी गराउनुभयाे ।

लोकनृत्य कलाकार संघ कास्कीकी सल्लाहकार बबिता गुरुङले हरेक व्यक्तिले आ–आफ्ना ठाउँबाट इतिहासलाई मेटिन नदिनका लागि पहल गर्न आवश्यक रहेको बताउनुभयाे । स्वतन्त्र पत्रकार संघ कास्कीका अध्यक्ष असफल गौतमले आकाशतिर फर्केर थुक्दाको छिटा कता जान्छ भन्ने चेतनास्तर नभएका हाम्रा राजनेताका कारण भित्तेपात्रोमा रहेको पुस २७ को विदा झिक्ने र राख्ने शृङ्खलाबाट सबैले पाठ सिक्नुपर्ने धारणा राख्नुभयाे ।

३०१ औं राष्ट्रिय एकता दिवस मूल समारोहकी प्रचार संयोजक पार्वता पौडेलले पृथ्वीनारायण शाहका दिव्य उपदेशलाई सबैले मनन् गर्न गरे आम नेपालीमा संवृद्धि आउने बताउनुभयाे । कार्यक्रममा गीताञ्जली साहित्य परिवारका पूर्व अध्यक्ष शिवप्रसाद गौतम, समाजसेवी जगन्नाथ कोइराला, एकबहादुर केसी, हरिचन्द्र आचार्यले एकता दिवसका बारे आफ्ना धारणा राख्नुभएकाे थियाे ।

एकता रचनावाचन नाम दिइएको कार्यक्रममा साहित्यकार मदन भण्डारी, अल्पविराम पोखरेली, छविलाल आचार्य, चन्द्रावती वाग्ले, शोभाकान्त गौडेल, बलराम तिमिल्सिना, वसन्त चालिसे, लक्ष्मण पौडेल, रुद्रबहादुर थापा, धर्मराज अल्पायु, नरेन्द्र रानाभाटलगायतले रचना वाचन गर्नुभएकाे थियाे ।

गीताञ्जली साहित्य परिवारका अध्यक्ष रामनाथ अधिकारी संगीले विगतका केही वर्षदेखि विभिन्न संघसंस्थाको सहकार्यमा त्रिदिवसीय एकता दिवस विशेष कार्यक्रम आयोजना हुँदै आएको बताउँदै २७ गतेको मूल समारोहमा सबैलाई सहभागी हुन आह्वानसमेत गर्नुभयाे ।

एकता रचनावाचन