काठमाडौं I चीनको तिब्बतमा मङ्लबार बिहान ६ः५० बजे गएको भूकम्पले नेपालका पूर्वी पहाडी जिल्लामा केही घरमा क्षति पुर्याएको छ। प्रदेश प्रहरी कार्यालय विराटनगरका अनुसार, भूकम्पका कारण सोलुखुम्बु, संखुवासभा, ओखलढुङ्गा र ताप्लेजुङ जिल्लामा केही घरहरुमा क्षति पुगेको हो।

प्रहरी वरिष्ठ उपरीक्षक भीम दाहालका अनुसार, ओखलढुङ्गाको चिसांखुुगढी ५ का इन्द्रबहादुर परियारको घरमा पूर्ण क्षति भएको छ भने सिद्धिचरण नगरपालिका-२ का हिमाल कार्की र खानीगाउँका चन्द्रबहादुर पुलामीको घरमा आंशिक क्षति पुगेको छ। सोलुखुम्बु जिल्लामा पनि तीन वटा घरमा क्षति पुगेको छ, जसमा खम्बुपासङ लाम्यु गाउँपालिका-५ का डिमा शर्माको घरमा पूर्ण क्षति रहेको छ।

ताप्लेजुङ जिल्लामा इलाका प्रहरी कार्यालय दोभानको कार्यालय प्रमुखको घरमा आंशिक क्षति पुगेको छ भने संखुवासभाको भोटखोला-१ किमाथांकाका तेन्छेदी शेर्पाको घर भत्किएको छ।

भूकम्पका कारण चीनको तिब्बतमा ५३ जनाको मृत्यु भएको पुष्टि भएको छ। भूकम्पको धक्का नेपालमा बिहानै ६ः५० बजे महसुस गरिएको थियो र त्यसपछि प्रहरीको १४ वटै जिल्लाको युनिटलाई परिचालन गरिएको छ।

प्रहरीले प्रभावित क्षेत्रहरूमा आपतकालीन राहत कार्यलाई प्राथमिकता दिइरहेको छ।

चीनमा गएको भूकम्पका कारण नेपालका केही पहाडी जिल्लामा क्षतिभूकम्पका कारण

प्रकाशित मिति: मङ्लबार, पुस २३, २०८१, ४:१२ बेलुका

लेखक: समाचारपाटी