पूर्वअर्थमन्त्री डा.युवराज खतिवडाले सरकारले सबै उद्यमी व्यवसायीलाई समान रुपले कारोबार र प्रतिष्पर्धा गर्ने मौका दिने बताउनुभएको छ ।

शुक्रवार काठमाडौंमा आयोजित नेपाल उद्योग तथा व्यवसायी महासंघको तेस्रो महाधिवेशनलाई सम्बोधन गर्दै उहाँले  यस्तो बताउनुभएको हो । उहाँले सरकारले कुनै निश्चित उद्योगी व्यवसायीको पक्षमा नीति निर्माण नगर्ने बताउनु भयो । उहाँले अर्थतन्त्रमा देखिएका कानूनी जटिलतालाई समाधान गर्न सरकार लागि परेको बताउनु भयो । उहाँले विगतमा अर्थतन्त्रमा देखिएका विभिन्न विकृतिका कारण समस्या उत्पन्न भएको बताउँदै सरकारले लिएको लक्ष्यमा पुग्न नसकिएको बताउनु भयो । उहाँले सरकारले राज्यका कुनैपनि निकायमार्फत तर्साउने, धम्क्याउने वा असुली गर्ने काम नगर्ने भन्दै उद्योग व्यवसायीलाई आश्वस्त पार्नुभयो । 
उहाँले भन्नुभयो, ‘खास गरी अहिले हाम्रो अर्थतन्त्रमा अघि उद्योग मन्त्रीले पनि भन्नुभयो, केही कानूनी जटिलताहरु छन् । त्यसलाई हामीले सल्ट्याउँदै छौँ । हिजोका अर्थतन्त्रका केही विकृतिहरुलाई हामीले समाधान गर्दै जानुपर्नेछ । जुन उत्साह हामीले अपेक्षा गरेका छौँ त्यो रुपमा अझै पुग्या छैनौँ कि भन्ने हामीलाई पनि लागेको छ । तर एउटा दुई वटा कुरामा तपाईहरु निश्चिन्त हुनुहोस् । पहिलो कुरा राज्यले सरकारले कुनै निश्चित व्यवसायीको पक्षमा मात्रै कुनै नीति निर्माण गर्दैन । त्यस्ता व्यवसायको पक्षमा मात्रै कुनै निर्णय गर्दैन । र राज्य निजी क्षेत्रमैत्री हुनका लागि सबै व्यवसायीलाई समान कारोबार गर्ने प्रतिस्पर्धा गर्ने मौका दिन्छ  भन्ने कुरामा यो सरकार तपाईहरु आश्वस्त हुनुहोस् । दोस्रो कुरा तपाईहरुले गल्ती नगरुन्जेल राज्यले थुन्ने छेक्ने दुरुत्साहित गर्ने काम गर्दैन । चाहे त्यो राजश्व अनुसन्धानको माध्यमबाट होस् चाहे सम्पती शुद्धिकरणको माध्यमबाट होस्, अख्तियारको माध्यमबाट होेस् वा अरु कुनै माध्यमबाट होस् । राज्यले राम्रो व्यवसाय गर्नेलाई तर्साउने धम्क्याउने र असुली गर्ने काम गर्दैन भन्ने कुरामा तपाईहरु ढुक्क हुनुहोस् ।’

पूर्वअर्थमन्त्री खतिवडाले उद्योग व्यवसायीका लागि आवश्यक परेको अवस्थामा राज्यले छिटो बाटोबाट नीति निर्माण गरी कानूनी समस्या समाधान गर्ने बताउनु भयो । उहाँले पछिल्लो समय उद्योग व्यवसायमा देखिएको ऊर्जा समस्या समाधान गर्न उद्योगी व्यवसायीले आफ्नै पहलमा केही गर्नुपर्ने भन्दै सरकारले खेल्नुपर्ने भुमिकाका बारेमा दबाब सिर्जना गर्नुपर्नेमा जोड दिनुभयो । –न्युज एजेन्सी नेपाल

उद्यमी व्यवसायीडा.युवराज खतिवडा

प्रकाशित मिति: शुक्रबार, चैत्र ७, २०८१, ४:१५ बेलुका

लेखक: समाचारपाटी