दोलखा उद्योग वाणिज्य संघको आयोजनामा पौष १३ गतेदेखि १० दिने वृहत दोलखा महोत्सव हुने भएको छ । दोलखा उद्योग वाणिज्य संघको आयोजनामा पौष १३ गतेदेखि २२ गतेसम्म दोलखा सदरमुकाम चरिकोटस्थित भीमेश्वर रंगशालामा १० दिने वृहत दोलखा महोत्सव हुन लागेको हो । मंगलवार काठमाडौंमा पत्रकार सम्मेलनको आयोजना गर्दै संघले महोत्सवको सम्पूर्ण तयारी पूरा भएको जानकारी दिएको छ ।

महोत्सवको उद्घाटन पौष १३ गते प्रधानमन्त्री पुष्पकमल दाहालले गर्ने जनाइएको छ । पत्रकार सम्मेलनमा बोल्दै दोलखा उद्योग वाणिज्य संघका अध्यक्ष इन्द्रबहादुर श्रेष्ठले महोत्सवमा १५० वटा स्टल राखिने जानकारी दिनुभयो । महोत्सवमा स्थानीय उत्पादन तथा परिकारको बिक्री, वितरण तथा प्रवद्र्धन गरिने उहाँले बताउनु भयो । स्टलहरुमा दोलखाका सबै स्थानीय तहहरु, सरकारी निकाय, नीजि क्षेत्र, कृषक, विभिन्न समूहहरु, संघसंस्था, उद्योगी व्यवसायीका उत्पादन लगायत प्रदर्शनीमा राखिने पनि उहाँले बताउनु भयो ।

अंग्रेजी नयाँ वर्षको अघिल्लो दिन पर्यटकका स्वागतका लागि स्ट्रिट फुड फेस्टिभलको आयोजना पनि गरिने भएको छ । महोत्सवमा दोलखा जिल्लाका पर्यटकिय स्थलहरुको फोटो प्रदर्शनी र वृत्तचित्र प्रदर्शनी पनि गरिने उहाँले जानकारी दिनुभयो । महोत्सवमा कलाकारहरुको सांस्कृतिक प्रस्तुतिका साथसाथै विभिन्न प्रकारका खेलकुद प्रतियोगिताहरु र विद्यालयस्तरीय प्रतियोगिताहरु पनि सञ्चालन हुने अध्यक्ष श्रेष्ठले बताउनु भयो । 

वृहत दोलखा महोत्सव

प्रकाशित मिति: मङ्लबार, पुस १०, २०८०, ५:२७ बेलुका

लेखक: समाचारपाटी