काठमाडौं I सुनसरीको धरान उपमहानगरपालिकाका मेयर हर्क साम्पाङ काठमाडौंको कीर्तिपुर नगरपालिकामा यही मंसिर १६ गते हुने मेयर पदको उपनिर्वाचनका लागि स्वतन्त्र उम्मेदवारलाई समर्थन गर्दै भोट माग्न आइपुगेका छन्।

साम्पाङले स्वतन्त्र उम्मेदवार राजमान महर्जनलाई समर्थन जनाउँदै सोमबारदेखि कीर्तिपुरमा घरदैलो अभियान थालेका छन्। आफ्नो कामको शैलीसँग मेल खाने र जनताको सेवामा समर्पित व्यक्ति महर्जन भएको उल्लेख गर्दै साम्पाङले उनी विजयी हुनुपर्ने बताए।

महर्जनलाई समर्थन गर्दै अर्का स्वतन्त्र उम्मेदवार नरेश श्रेष्ठले आफ्नो उम्मेदवारी फिर्ता लिएपछि स्वतन्त्र उम्मेदवारहरूको तर्फबाट बलियो अभियान चलिरहेको छ। उपनिर्वाचनमा ठूला दलका उम्मेदवारहरूसँग स्वतन्त्रहरू प्रतिस्पर्धा गर्न तयार देखिन्छन्।

कीर्तिपुर नगरपालिकामा मेयरसहित वडा नम्बर १ र ४ का वडाध्यक्ष पदका लागि पनि उपनिर्वाचन हुँदैछ। तीनभन्दा बढी स्वतन्त्र उम्मेदवारहरूबीच मिलेर अघि बढ्न दबाब सिर्जना भइरहेको छ।

धरानमा २०७९ को स्थानीय तह निर्वाचनमा ठूला दलका उम्मेदवारलाई हराउँदै मेयर बनेका साम्पाङले लौरो चिन्ह लिएर स्वतन्त्र उम्मेदवारी दिएका थिए। धरानको मेयरमा विजयी भएपछि उनी स्वतन्त्र राजनीतिक शैलीको प्रेरणा बनेका छन्।

कीर्तिपुरको उपनिर्वाचनमा स्वतन्त्र उम्मेदवारहरूलाई समर्थनको लहर थप्दै साम्पाङको यो अभियानले ठूलो प्रभाव पार्ने अपेक्षा गरिएको छ।

मेयर हर्क साम्पाङमेयर हर्क साम्पाङ कीर्तिपुर

प्रकाशित मिति: सोमवार, मंसिर १०, २०८१, ४:०३ बेलुका

लेखक: समाचारपाटी