विराटनगर। गत सोमबार सुनसरीको धरानको जंगलमा अर्धनग्न अवस्थामा मृत भेटिएकी महिलाको पहिचान खुलेको छ । मृतक महिला धनकुटाको महालक्ष्मी नगरपालिका– २ की ३४ वर्षीया चुनकुमारी दाहाल बुढाथोकी रहेको खुलेको जिल्ला प्रहरी कार्यालय सुनसरी प्रवक्ता डीएसपी योगराज खतिवडाले बताउनुभयाे ।

डीएसपी खतिवडाका अनुसार उहाँको माइती महालक्ष्मी नगरपालिका १ मा पर्छ । दाहाल सुनसरीको इटहरी उपमहानगरपालिका–२, हलगडामा बसोबास गर्दै आउनुभएकाे थियाे । प्रहरीका अनुसार आफन्तले शवको पहिचान गरेका हुन् ।

प्रहरीका अनुसार उहाँका श्रीमान् प्रेम दाहाल वैदेशिक रोजगारीका लागि कोरियामा हुनुहुन्छ । धरान उपमहानगरपालिका–६ स्थित पञ्चकन्या सामुदायिक वनमा सोमबार दिउँसो महिलाको शव फेला परेको थियो । गोठालो गएकाहरुले वनभित्र लसुनेको रुखमुनि अर्धनग्न अवस्थामा महिलाको शव देखेपछि प्रहरीलाई खबर गरेका थिए ।

शव फेला परेको स्थानमा प्रहरीद्वारा गरिएको प्रारम्भिक परीक्षणमा आपराधिक गतिविधिको आशंका गरिएको छ। प्रहरीले घटनास्थलमा महिलाको शरीरमा चोटपटक देखिएको, अनुहारमा गम्भीर चोट रहेको र लुगाफाटो अस्तव्यस्त अवस्थामा भेटिएको जनाएको छ। महिलाको घाँटी कसेर हत्या गरेपछि लसुनेको रुखमुनि अडेस लगाएर शव छाडेजस्तो देखिएको प्रहरीको भनाइ छ । शवको कम्मर मुनिको कपडा खोलिएको अवस्थामा थियो । प्रहरीका अनुसार अन्यत्र हत्या गरी महिलाको शव घिसारेको जस्तो पनि देखिन्छ । महिलाको पहिचान खुलेपछि प्रहरीले हत्याको आशंकामा अनुसन्धान गरिरहेको छ ।

प्रहरीका अनुसार मृतक महिला करिब २ वर्षअघि छोरा पढाउनका लागि इटहरीमा डेरा गरी बस्न थाल्नुभएकाे थियाे । मृतकको शव धरानस्थित बीपी कोइराला स्वास्थ्य विज्ञान प्रतिष्ठानमा पोस्टमार्टमका लागि राखिएको छ।

source:- Urlabarinews

धरानमृत

प्रकाशित मिति: बिहिबार, चैत्र २७, २०८१, ६:१६ बेलुका

लेखक: समाचारपाटी