जनकपुरधाम । धनुषा जिल्ला अदालतले रहस्यमय मृत्यु भएको आरती साहको मुद्दामा अभियुक्त बनाइएकाे उहाँका श्रीमान् र ससुरालाई पूर्पक्षका लागि थुनामा पठाउन आदेश दिएको छ। 

जिल्ला अदालत धनुषाका न्यायाधीश रामप्रसाद न्यौपानेको एकल इजलासले आरतीका श्रीमान् मोतिबाबु साह र ससुरा मदन मोहन ब्याहुत सुडीलाई पुर्पक्षका लागि थुनामा पठाउने आदेश दिएको हो।

गत जेठ ७ गते साँझ आफ्नै घरमा मृत अवस्थामा फेला परेकी आरतीको हत्या भएको भन्दै माइती पक्षले जाहेरी दिएपछि प्रहरीले आरतीका श्रीमान् मोतीबाबु र ससुरा मदन मोहनलाई पक्राउ गरी अनुसन्धान गरेको थियो। 

आफ्नै घरमा झुण्डिएको अवस्थामा फेला परेकी भनिएकी आरतीको घाँटी लगायत शरीरका अन्य भागमा पनि निलडाम तथा घाउचोट भेटिएपछि आरतीको हत्या भएको भन्दै किटानी जाहेरी दिइएको थियो। त्यसपछि अनुसन्धान गरेको प्रहरीले घटनामा आरतीका श्रीमान् र ससुराको संलग्नतामा घटना भएको देखिएपछि जिल्ला सरकारी वकिल कार्यालय धनुषाले अदालतमा मुद्दा दायर गरेको थियो। गत असार १ गते दर्ता भएको मुद्दामा असार ३ मा लगातार थुनछेक बहस भएको थियो। प्रतिवादीतर्फ धेरै कानुन व्यवसायी रहेको कारण हेर्दा हेर्दैमा राखेर उक्त मुद्दामा बहस सुनिएको थियो।

मंगलबार खाजा समय अघि बहस सकिएपछि न्यायाधीश रामप्रसाद न्यौपानेको इजलासले दुवै प्रतिवादीलाई पुर्पक्षका लागि थुनामा पठाउने आदेश दिएको हो। 

जिल्ला अदालत धनुषाहत्या प्रकरण

प्रकाशित मिति: मङ्लबार, असार ५, २०८०, ६:०९ बेलुका

लेखक: समाचारपाटी