स्याङ्जा २ बाट प्रतिनिधिसभा सदस्यमा नेपाली कांग्रेसका उपसभापति धनराज गुरुङ निर्वाचित हुनुभएकाे छ । शनिबार राति सकिएको मतगणना अनुसार धनराजले ३१ हजार ४ सय ६६ मत पाउनुभयाे भने उहाँका निकटतम प्रतिस्पर्धी नेकपा एमालेकी सचिव पदमा अर्यालले २५ हजार ८ सय ३९ मत पाएको निर्वाचन अधिकृतको कार्यालयले बताएको छ । उहाँहरुबीचको मतान्तर ५ हजार ६ सय २७ रहेकाे छ ।
राष्ट्रिय स्वतन्त्र पार्टीका उम्मेदवार टिकराज गुरुङले ८ हजार १ सय १३ मत पाउनुभएकाे छ । १ लाख १६ हजार ६ सय ७८ मतदाता रहेको क्षेत्रमा ७० हजार १ सय ९१ मत खसेको थियो ।
यो क्षेत्रबाट २०७४ सालमा एमालेबाट अर्याल नै निर्वाचित हुनुभएकाे थियाे । ०७४ मा बाम गठबन्धनबाट उम्मेदवार हुनुभएकी अर्यालले कांग्रेसका उम्मेदवार गोपालमान श्रेष्ठलाई झन्डै ३६ सय मतान्तरले पराजित गर्नुभएकाे थियाे । तर यसपटक गोपालमानले प्रत्यक्ष चुनाव लड्नुभएन र धनराज गुरुङ सोही क्षेत्रमा उम्मेदवार बन्नुभयाे ।
४ मंसिरमा भएको मतदानका क्रममा नेपाली कांग्रेसले केही मतदान केन्द्रमा बुथ कब्जा गरेको भन्दै नेकपा एमालेले पुनः मतदानको माग गर्दै निर्वाचन आयोगमा निवेदन दिएको थियो । निर्वाचन आयोगले १४ मंसिरमा पुनः मतदान नगर्ने निर्णय गर्यो । त्यसपछि मतगणना सुरु भएको थियो ।
स्याङ्जा २ अन्तर्गतको दुबै प्रदेश सभा निर्वाचन क्षेत्रमा कांग्रेसकै उम्मेदवार निर्वाचित भएका छन् । स्याङ्जा २ (१) बाट भोजराज अर्याल र (२) बाट महेश भट्टराई निर्वाचित हुनुभएकाे हाे । प्रदेश सभामा कांग्रेसका भोजराजसंग एमालेका मोहन रेग्मी र भट्टराईसंग बुद्विमान श्रेष्ठ पराजित हुनुभएकाे छ ।