काठमाडौं । प्रतिनिधिसभाकी उपसभामुख इन्दिरा राना मगरले साइकल सवारीले स्वस्थ तथा स्फूर्त रहन मद्दत गर्ने बताउनुभएकाे छ।

अन्नपूर्ण मिडिया नेटवर्कले अयोजना गरेको ‘अन्नपूर्ण राइड फर लाइफ २०२३’ को उद्घाटन गर्दै उपसभामुख मगरले बाँचुञ्जेल स्वस्थ र बलियो बन्न साइकल चलाउनु आवश्यक रहेको बताउनुभयाे।

मगरले हरेक वर्ष साइकल र्‍यालीमा सहभागिका रूपमा उपस्थित हुने गरेको र यो वर्ष प्रमुख अतिथि बन्न पाएकामा खुसी व्यक्त गर्नुभयाे। ‘साइकल मेरो साथी हो। जीवनका योजना पनि साइकल चढेकै बेलामा गर्छु,’ मगरले भन्नुभयाे, ‘विगतका वर्षमा सहभागिका रूपमा अन्नपूर्ण साइकल र्‍यालीमा उपस्थित हुन्थें। म भाग्यमानी छु, यो वर्ष प्रमुख अतिथि नै बन्ने अवसर पाएँ।’

विश्व क्यान्सर दिवसका अवसरमा आयोजना गरेको साइकल र्‍यालीमा १ हजार ५ सय जना सहभागी थिए। उपसभामुख मगरले आफूसँग सम्पत्तिका रूपमा साइकल नै रहेको पनि बताउनुभयाे।

‘काठमाडौंमा मेरो घर छैन तर २ वटा साइकल छ।’ साइकल चलाउँदै आफूले जीवन जिउने कला सिकेको जिकिर गर्नुभयाे। ‘साइकल चलाउँदा खाल्डाखुल्डीबाट जोगिइन्छ। साइकल चलाउँदै मैले जीवनका उकाला ओरालालगायत अवरोध हटाउन सिकें,’ उहाँले भन्नुभयाे।

उपसभामुख मगरले साइकल चढेरै पाल्पा, चितवन आदि ठाउँ तथा जेलमा बालबालिका भेट्न पनि साइकल चढेर जाने गरेको बताउनुभयाे। ‘५३ वर्षको उमेरमा मलाई १६ वर्षको जस्तो अुनभूत हुन्छ। साइकलले स्वस्थ तथा स्फूर्त रहन मलाई मद्दत गरेको छ,’ मगरले थप्नुभयाे, ‘बाँचुञ्जेल स्वस्थ र बलियो बन्न साइकल चलाउनु आवश्यक छ।’

इन्दिरा राना मगर

प्रकाशित मिति: शनिबार, माघ २१, २०७९, ४:५० बेलुका

लेखक: समाचारपाटी