काठमाडौं । आज देशका तीन प्रदेशमा हल्का वर्षा हुने सम्भावना रहेको छ। जल तथा मौसम विज्ञान विभागका अनुसार प्रदेश नं एक, बागमती र गण्डकी प्रदेशका पहाडी भू–भागमा आंशिक बदली एक–दुई स्थानमा हल्का वर्षा हुने छ।
साथै ती प्रदेशका उच्च पहाडी भू–भागमा हल्का हिमपातको सम्भावना छ। त्यस्तै विभागका अनुसार तराईका केही भू–भागमा बिहानीपख हुस्सु कुहिरो लाग्ने तथा देशका अधिकांश भू–भागमा तापक्रम क्रमिकरूपमा घट्दै जाने संभावना रहेको बताइएको छ।
बाँकी भू–भागमा मौसम सामान्यतया सफा रहने विभागले जनाएको छ । राति प्रदेश नं १ का पहाडी भू–भागमा आंशिकदेखि पूर्ण बदली रही बागमती प्रदेश र गण्डकी प्रदेशका पहाडी भू–भागमा आंशिक बदली तथा बाँकी भू–भागमा मौसम सामान्यतया सफा रहनेछ । देशभर चिसो बढ्ने भएकोले चिसोबाट बच्न आवश्यक सावधानी अपनाउन विभागले अनुरोध गरेको छ ।
मौसम पूर्वानुमान महाशाखाको पछिल्लो विवरणअनुसार आज काठमाडौं उपत्यकाको न्यूनतम तापक्रम ७।६ डिग्री र अधिकतम तापक्रम १८।७ डिग्री सेल्सियस रहेको छ । आज सबैभन्दा कम जुम्लाको न्यूनतम तापक्रम (४।५ डिग्री र सबैभन्दा धेरै जनकपुरको अधिकतम तापक्रम २४।८ डिग्री सेल्सियस रहेको छ ।