ढाका । बंगलादेशमा सरकारी जागिरमा प्रदान गरिएको आरक्षण विरोधमा जारी आन्दोलनले हाल उग्र रुप लिएको छ। प्रदर्शनकारीहरूले बिहीबार साँझ बंगलादेशको मुख्य सरकारी टेलिभिजन च्यानल बीटीभीको मुख्यालयमा आगजनी गरेका थिए। एएफपी रिपोर्टका अनुसार बिहीबार साँझ सयौं प्रदर्शनकारीहरू बीटीभीको क्याम्पसमा प्रवेश गरेका थिए। उनीहरुले त्यहाँ ६० भन्दा बढी गाडीमा आगजनी गरे।

प्रधानमन्त्री शेख हसिनाले हिजो बीटीभीमा अन्तर्वार्ता दिएकी थिइन् । बिहीबार विद्यार्थी र प्रहरीबीच हिंसात्मक झडप भएको थियो । एएफपी रिपोर्टका अनुसार बिहीबार भएको हिंसामा कम्तीमा २५ जनाको मृत्यु भएको समाचार विभिन्न सञ्चारमाध्यमा छन्। यसबाहेक एक हजारभन्दा बढी घाइते भएका जनाइएको छ। आन्दोलन सुरु भएयता कम्तीमा ३२ जनाको मृत्यु भइसकेको दैनिक भास्करले उल्लेख गरेको छ।

बंगलादेशमा जारी हिंसापछि त्यहाँबाट नेपाल, भुटान तथा भारतीय नागरिकको पलायन सुरु भएको छ । समाचार एजेन्सी पीटीआईको रिपोर्ट अनुसार, हिंसा पछि त्यहाँ फसेका ३ सयभन्दा बढी भारतीय, नेपाली र भुटानी नागरिक मेघालय पुगेका छन्। तीमध्ये अधिकांश विद्यार्थी हुन् ।

बंगलादेशविरोधमा प्रदर्शन

प्रकाशित मिति: शुक्रबार, साउन ४, २०८१, ९:५७ बिहान

लेखक: समाचारपाटी