पाँचथर । दुई बेलायती नागरिक र एक नेपाली युवक सुदूरपश्चिमको डडेल्धुराबाट करिब १५ सय किलोमिटर साइकल यात्रा गर्दै पूर्वी नेपालको फिदिम आइपुगेका छन् । बेलायती नागरिक मार्क मुरफि, रिर्चड विलियम र नेपाली युवा ओम अधिकारी पहाडै पहाड १५ सय किलोमिटर साइकल यात्रा गर्दै सोमबार पाँचथर सदरमुकाम फिदिम आइपुगेका हुन् ।

डडेल्धुराबाट फिदिम आइपुग्न २८ दिन लागेको साइकल यात्री ओम अधिकारीले जानकारी दिनुभयाे । मध्यपहाडका जनजीवन, कृषि, संस्कृति र रहनसहनको विषयमा अध्ययन गर्दै पुस्तक लेख्नका लागि साइकल यात्रा गरेको बेलायती नागरिक मार्क मुरफिले बताउनुभयाे ।

‘यो यात्रा पछि पहाडी जनजजीवन, रहनसहन, कृषि, संस्कृति र भुगोलकाबारेमा किताब लेख्ने उद्देश्यको साथ यो यात्रा गरेका छौं’, मुरफिले भन्नुभयाे । मध्यपहाडी लोकमार्ग पहाडै पहाड पूर्वबाट पश्चिम यात्रा गर्न सकिने एकमात्र सडक हो । यसमा पूर्वी पहाडी संस्कृतिदेखि पश्चिमसम्मको संस्कृतिको अध्ययन गर्न सकिन्छ ।

पूर्वदेखि पश्चिमसम्मका विभिन्न गाउँ हुँदै बनेको यो सडकले सडक सुविधामात्र नभई अन्य विकासका आयमहरू पनि खोलेको छ । कतै नयाँ शहर बनेका छन् भने अन्य विकास संचरना बनाएको छ । शहर जोड्न सजिलो र सहज भएको देखिन्छ ।

साइकल यात्रा

प्रकाशित मिति: मङ्लबार, मंसिर १२, २०८०, ३:१३ बेलुका

लेखक: समाचारपाटी