प्रतिनिधि सभाका सांसदहरुले नेपालको भन्सार कार्यालयहरु अनियमितताको केन्द्र बनेको भन्दै चिन्ता व्यक्त गरेका छन् ।

बिहीवार प्रतिनिधि सभाअन्तर्गतको अर्थ समितिको बैठकमा बोल्दै सांसदहरुले भन्सार सम्बन्धी विधेयकलाई कानूनलाई संशोधन र एकीकरण गर्न बनेको विधेयक माथिको छलफलमा विचार राख्ने क्रममा नेपाली भन्सार अनियमितताको केन्द्र बनेको बताएका हुन् । समितिको छलफलमा सांसदहरुले अनियमितताको लागि तथ्यांक राख्ने, सर्भरु बिगार्नेदेखि सामान जाँचपास गर्ने, एक्स रे मेसिन बिगार्नेसम्मको काम गर्ने गरेको बताए । भन्सारका कर्मचारीहरुको व्यवहार सेवाग्राहीमैत्री नभएको आरोप पनि सांसदहरुले लगाएका छन् । समितिको बैठकमा बोल्दै नेकपा एमालेका सांसद पदम गिरीले भन्सारका मेसिन बिग्रिनु भनेको भ्रष्टाचार बढ्ने माध्यम बनेको बताउनु भयो । एक पटक बिग्रिएको मेसिन वर्षौंसम्म नबन्नु भनेको भ्रष्टाचार गर्ने नियत भएको बताउनु भयो । 

बैठकमा नेकपा एमालेका सांसद सूर्यबहादुर थापा क्षेत्रीले सुन तस्करी सम्बन्धी जाँचबुझ आयोगको प्रतिवेदन सार्वजनिक गरेर समितिले काम गर्नुपर्ने बताउनु भयो । आयोगले औंल्याएको विषयलाई समेटेर अघि बढनुपर्ने बताउनु भयो । आयोगको प्रतिवेदन अहिलेसम्म सार्वजनिक नगर्नु भनेको भन्सारको संसार ठिक छैन भन्ने बुझ्नुपर्ने बताउनु भयो । 

समितिको बैठकमा नेकपा (माओवादी केन्द्र) का सांसद छिरिङ डम्डुल लामाले कर लिएर सुन ल्याउन पाउनुपर्ने व्यवस्था हुनैपर्ने बताउनु भयो । सुनमा कडाई गर्नाले अवैध ओसारपसार बढेको र राजश्व पनि गुमेको तर्क गर्नुभयो । सरकारले कडाईका साथ कर लिएर सुन, गाँजा, मदिरा, रक्तचन्दनको ओसारपसार गर्न पाउने सुविधान दिनुपर्ने बताउनु भयो । 

बैठकमा सांसद्द्वय ज्ञानबहादुर शाही र गंगा कार्कीले भारतीय गाडीको नेपाल प्रवेश र असिमित समय बस्न पाउने सुविधाले नेपाली व्यवसायीको रोजगारी गुमेको आरोप लगाउनु भयो । नेपाली भूमिमा भारतीय गाडीको मनोमानी रोक्नुपर्ने बताउनु भयो ।

 बैठकमा सांसद भगवती चौधरीले भन्सार महशुल र करको कारण उपभोग्य सामान नेपालमा महंगो हुने र सीमावर्ती भारतीय बजारमा सस्तोमा पाइने भएकाले सीमावर्ती क्षेत्रका नेपालीहरु सबै भारतीय बजारमा जाने गरेको विषय सबैले बुझ्नुपर्ने बताउनु भयो । भन्सार महशुल कम नगरेसम्म सीमावर्ती नेपाली बजार चल्न नसक्ने बताउनु भयो । 

बैठकमा अधिकांश सांसदहरुले सरकारले भन्सार महशुल घटाएर सीमावर्ती नेपाली बजार चलायमान बनाउनुपर्ने माग गरेका छन् । उनीहरुले भन्सारमा आवश्यक सामग्रीहरुको खरिद गरी चुस्त बनाउनुपर्ने धारणा राखेका हुन् ।

—न्युज एजेन्सी नेपाल

प्रतिनिधि सभाभन्सार कार्यालय

प्रकाशित मिति: शुक्रबार, पुस १९, २०८१, ६:०५ बिहान

लेखक: समाचारपाटी