सुर्खेत । नेकपा एमालेको कर्णाली प्रदेश अधिवेशनमा शनिबारका लागि निर्धारित मतदान कार्यक्रम आजलाई सारिएको छ ।सहमतिका लागि शनिबार दिनभर प्रयास गर्दा सफल नभएपछि साँझ मतदान गर्ने तयारी थियो । तर सुरक्षाको कारण देखाउँदै आज बिहानका लागि सारिएको एमाले नेता विष्णु रिजालले जानकारी दिनुभयाे ।

आज बिहान ८ बजेदेखि दिउँसो २ बजेसम्म सुर्खेतको सिटी हलमा मतदान हुने कार्यतालिका तय गरिएको छ । एमालेको कर्णाली प्रदेश अध्यक्षका लागि तीन, उपाध्यक्षका लागि तीन, सचिवमा दुई, उपसचिवमा तीन जनाबीच प्रतिस्पर्धा हुँदैछ ।

प्रदेश अध्यक्षका लागि सल्यानका गुलाबजंग शाह, कालीकोटका मीनबहादुर शाही र कालीकोटकै प्रकाश रोकायाले उम्मेदवारी दिनुभएकाे छ । गुलाबजंग र मीनबहादुरले प्यानल नै बनाएर चुनावमा भिड्दै हुनुहुन्छ भने प्रकाशको प्यानल छैन ।

शाह स्थायी कमिटी सदस्य यामलाल कँडेल समूहका हुनुहुन्छ भने शाही गोरख बोगटी समूहका हुनुहुन्छ । अध्यक्षमा उम्मेदवारी दिनुभएका दैलेखका राजबहादुर शाही र कालीकोटमा प्रेमबहादुर सिंहले भने शनिबार उम्मेदवारी फिर्ता लिनुभएकाे थियाे ।

कर्णाली प्रदेशनेकपा एमाले

प्रकाशित मिति: आइतवार, अशोज १४, २०८०, ८:३८ बिहान

लेखक: समाचारपाटी