काठमाडौं । नेकपा माओवादी केन्द्रले तीन महिने रुपान्तरण विशेष अभियान सञ्चालन गर्ने भएको छ।  केन्द्रले भदौ १६ गतेदेखि तीन महिनासम्म विशेष रुपान्तरण अभियान सञ्चालन गर्ने भएको हो। गत मंसिरमा भएको निर्वाचनमा  तेस्रो पोजिसनमा खुम्चिएको माओवादी केन्द्रले संगठन विस्तार गर्न रुपान्तरण अभियान सञ्चालन गर्न लागेको हो।

केन्द्रीय कमिटीको बैठकको समापन समारोहलाई सम्बोधन गर्दै पार्टी अध्यक्ष पुष्पकमल दाहालले प्रत्येक वडाका प्रत्येक घरघरमा पुगी अभियान सञ्चालन गर्न नेता तथा कार्यकर्तालाई निर्देशन दिनुभएकाे हाे।

दाहालले भन्नुभयाे, 'वडाका कुनै पनि घर छुट्नु हुँदैन। यो अभियानले नयाँ पार्टी निर्माणमा सहयोग गर्छ।' अध्यक्ष दाहालले अझैं पनि राष्ट्रिय तथा अन्तर्राष्ट्रिय शक्तिहरूले पार्टीलाई घेराबन्दीमा पारिरहेको बताउनुभयाे। 

दाहालले पार्टी एक ढिक्का भएर अघि बढ्ने विश्वास व्यक्त गर्नुभयाे।  उहाँले अहिले सरकारले थालेका सकारात्मक कामहरू जनतासँग स्थापित गरेर परिवर्तनको स्वामित्व लिनेगरी नागरिकसमक्ष जान एकजुट भएको बताउनुभयाे। दाहालले माओवादी केन्द्रले देशको फेरि नेतृत्व लिनेगरी अगाडि बढेको उद्घोष गर्नुभयाे।

अभियाननिर्देशनपुष्पकमल दाहाल

प्रकाशित मिति: आइतवार, साउन २१, २०८०, ४:४७ बेलुका

लेखक: समाचारपाटी