काठमाडौं । यातायात व्यवस्था कार्यालय, सुकेधाराका पूर्व निमित्त प्रमुख गणेशप्रसाद पोखरेलमाथि गैरकानूनी सम्पत्ति आर्जन गरेको अभियोगमा भ्रष्टाचार मुद्दा दायर भएको छ ।

अख्तियार दुरुपयोग अनुसन्धान आयोगले पोखरेलमाथि गैरकानूनी सम्पत्तिआर्जन गरेको आरोपमा १ करोठ ६ लाँख रुपैंया विगो मागदावी सहित भ्रष्टाचारमुद्दा दायर गरेको हो ।

यातायात व्यवस्था कार्यालय सवारीचालक अनुमतिपत्र सुकेधारा चावहिलका तत्कालीन निमित्त कार्यालय प्रमुख पोखरेल हाल राष्ट्रिय भूमि आयोग, ताहाचलमा कार्यरत हुनुहुन्छ । उहाँ शाखा अधिकृत स्तरका कर्मचारी हुनुहुन्छ ।

१ असार २०४६ मा सेवा प्रवेश गर्नुभएका उहाँमाथि उजुरी परेपछि अख्तियारले १५ फागुन २०७८ सम्मको सम्पत्ति जाचबुझ गरेको थियो ।

त्यसक्रममा उहाँले ४ करोड ३७ लाँख रुपैंया सम्पत्ति जोडेको भेटिएको हो । छानविन हुदा उहाँले ३ करोड ३१ लाँख रुपैंयामात्रै कानूनी रुपमा आर्जन गरेको खुल्यो ।

स्रोत नखुलेको सम्पत्ति जफत हुनुपर्ने माग राखी अख्तियारले मुद्दा दायर गरेको हो । अख्तियारले उहाँकी श्रीमती विमला न्यौपाने पोखरेललाई पनि मुद्दामा प्रतिवादी बनाएको छ ।

यातायात कार्यालयका शाखा अधिकृत पोखरेलले बारिश्रमिक बाहेक घर बहाल, बीमा, रेमिट्यान्स, मोटरसाइकल विक्री, शेयर लगायतबाट सम्पत्ति जोडेको दावी गर्नुभएकाे थियाे । उहाँको दावीलाई स्विकार गरेर हेर्दा पनि त्यसबाहेकको आर्जनको स्रोत नखुलेको अख्तियारको दावी छ ।

यातायात कार्यालयहरु भ्रष्टाचारका कारण बदनाम छन् । सेवाग्राहीलाई समयमा लाईसेन्स नदिई सास्ती दिने र त्यही लाईसेन्स महंगोमा बेच्ने गरेको आरोपमा यातायात कार्यालयका कर्मचारीहरुमाथि पटकपटक छानविन भएको छ ।

source:-onlinekhabar

भ्रष्टाचार मुद्दा

प्रकाशित मिति: शुक्रबार, पुस २९, २०७९, ३:२९ बेलुका

लेखक: समाचारपाटी