काठमाडौं । संवैधानिक परिषद्को बैठक आज बस्ने भएको छ। भावि प्रधानन्यायाधीशको नाम सिफारिस गर्नका लागि आज पुन: संवैधानिक परिषद्को बैठक बस्न लागेको हो। 

आइतबार प्रमुख प्रतिपक्ष दल एमालेका अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डलाई भेटेर तत्काल संवैधानिक परिषद् बैठक तत्काल बोलाउन दबाब दिएपछि मंगलबार बैठक बसेको थियो। तर उक्त बैठकमा छलफल बिना निष्कर्ष आज बस्ने गरी स्थगित भएको थियो।

राष्ट्रिय सभाका अध्यक्ष गणेशप्रसाद तिमिल्सिनाका अनुसार उक्त बैठकमा प्रधानन्यायाधीश र अन्य संवैधानिक निकायहरूको नियुक्तिको विषय छलफल भएको थियो। उहाँले आजको बैठकमा प्रधानन्यायाधीश सिफारिस र रिक्त रहेका अन्य संवैधानिक निकायहरूको नियुक्तिको विषय पनि छलफल हुने बताउनुभयाे।

बैठकमा प्रधानमन्त्री प्रचण्ड, प्रमुख प्रतिपक्षी दलका नेता ओली, सभामुख देवराज घिमिरे, राष्ट्रिय सभाका अध्यक्ष तिमिल्सिना, प्रधानन्यायाधीश हरिकृष्ण कार्की र उपसभामुख इन्दिरा राना सहभागी हुनेछन्।

प्रधानन्यायाधीश हरिकृष्ण कार्कीको कार्यकाल सकिन केही दिन मात्र बाँकी रहेको छ। संवैधानिक प्रावधान अनुसार संवैधानिक परिषद्ले प्रधानन्यायाधीश वा संवैधानिक निकायका कुनै प्रमुख वा पदाधिकारीको पद रिक्त हुनुभन्दा एक महिना अगावै यस संविधानबमोजिम नियुक्तिका लागि सिफारिस गर्नुपर्नेछ।

बहालवाला प्रधानन्यायाधीश कार्की अवकाशमा जाने भएकाले केहि दिनमा बिदामा बस्ने र प्रधानन्यायाधीश नियुक्ति प्रक्रिया तत्काल अगाडि बढाउनुपर्ने भएपनि प्रक्रिया थालिएको छैन। राजनीतिक खिचातानीका कारण यस अगाडि पनि सर्वोच्च अदालत लामो समय कामुको भरमा चलेको थियो। 

प्रधानन्यायाधीशसिफारिस

प्रकाशित मिति: बिहिबार, साउन १८, २०८०, १०:१५ बिहान

लेखक: समाचारपाटी