प्रधान सेनापति प्रभुराम शर्माले विद्यमान कानून नसच्याएसम्म निर्धारित समयमा काठमाडौं–तराई÷मधेस द्रुतमार्ग निर्माणको काम नसकिने बताउनुभएको छ । 

बुधवार प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा बोल्दै प्रधान सेनापति शर्माले कानूनी उल्झनका कारण काठमाडौं–तराई÷मधेस द्रुतमार्ग सडक निर्माणको काम अगाडी बढाउन नसकिएको बताउनुभएको हो । उहाँले कानूनी प्रक्रियाका कारण ४ वटा रुख काट्न ९ महिनासम्म लाग्ने गरेको उदाहरण दिँदै यही कानूनी व्यवस्था रहिरहेमा २०८३ साल सम्ममा द्रुतमार्ग निर्माणको काम नसकिने स्पष्ट पार्नुभयो । उहाँले विकास निर्माणमैत्री कानून नभएको भन्दै यसकारण काम गर्न ढिलाइ भइरहेको बताउनु भयो । उहाँले पैसाको कारणले काम गर्न ढिलो नभएको बताउनु भयो । प्रधान सेनापति शर्माले नेपाली सेनाले फास्ट ट्रयाक निर्माण गर्नका लागि नमागेको भन्दै सरकारले दिएको जिम्मेवारी स्वीकार गरेर काम गरिरहेको बताउनु भयो । 

उहाँले भन्नुभयो – ‘नेपाली सेनाले फास्टट्रयाक कहिलेपनि मागेको होइन । हामीले मागेर यो भएको होइन । तपाईहरुले नै दिएको हो । तपाईकै सरकारले दिएको हो । त्यसलाई सहस्र स्वीकार गरेर काम गरिरहेका छौँ । कोशिस गरिरहेका छौँ । यसलाई अगाडी बढाउन कोशिस गरिरहेका छौँ । यदी फास्ट ट्रयाक बनाउनुपथ्र्यो भने त फास्ट ट्रयाकमा नियम पनि दिनुपथ्र्यो नि त । खोइ ? ४ वटा रुख काट्नलाई ९ महिना लागेको छ । यो कसको गल्ती ? म कसैको पनि भन्दिनँ । वन मन्त्रालयलाई दिन्न । तपाईहरुले बनाइदिएको नियम हो त्यो । इआइए, एसइआइए गर्ने कसले बनाइदिएको नियम हो ? हजुरहरुले बनाइदिएको नियम हो । वन मन्त्रालयमा लिएर जान्छ । दश जनालाई नमस्कार गर्छ । पख्नुस् त्यहाँ छलफल भएको छैन । गाउँमा कर्मचारी पुगेको छैन । अनेकथरी छ उहाँहरुले पनि प्रक्रिया पूरा गर्नुपर्छ । ९ महिना लाग्छ ४ वटा रुख काट्न । मैले प्रधानमन्त्रीज्यूलाई, रक्षा मन्त्रीज्यूलाई देखाएको रुख अहिलेसम्म काटेको छैन । वैशाखमा देखाएको रुख । त्यो समस्या हो । खोइ त फास्ट ट्रयाकमा नियम दिन सक्नुभएको ? काम फास्टट्रयाकमा गर्नुस्, नियम, कानुनचाहीँ उहिँ पुरानो छ । २०१७ सालको नियमसुद्ध देखाउनुहुन्छ । यहीँ हो । हामीले विकास निर्माण गर्नलाई विभिन्न किसिमका कानूनहरु जति दिनुपर्ने हो त्यति दिन सकेका छैनौँ । त्यसले गर्दापनि यो ढिलाइ भइराखेको छ । पैसाको कारणले भएको छैन । कुनै अनियमिता भएको छैन । यही तालले हो भने २०८३ सालमा पनि बन्दैन । मलाई त्यो कानून सच्याएर, ४ वटा रुख काट्न ९ महिना लाग्छ भने यो कानून नसच्चिइकन हुँदैन । मैले गर्न सक्दिनँ भनेको छैन । गर्न सकिन्छ । गराउनुपर्छ ।’

उहाँले नेपाली सेनाले द्रुतमार्ग निर्माणको काममा विद्यमान ऐन, कानून र नियमको परिधिभित्र बसेर ठेक्का लगाएको पनि बताउनु भयो । उहाँले द्रुतमार्ग निर्माणको काममा अहिलेसम्म अनियमितता नभएको र आगामी दिनमा पनि अनियमितता हुन नदिने बताउनु भयो । भ्रष्टाचार भएमा कारबाही गर्ने उहाँको भनाई छ । 
उहाँले भन्नुभयो – ‘हामी भ्रष्टाचार हुन दिदैनौँ । भएछ भने कारबाही पनि गर्छौं । यथेष्ट हामीसँग कानून छ । नेपाल सरकारले बनाइदिएको कानून छ । हामीलाई नेपाल सरकारले यथेष्ट बजेट दिएको छ । तर पैसा छ भन्दैमा जे पायो गर्नु भएन ।  जमिन पाएको छैन । रुट पाएको छैन । त्यसै लगेर पैसा खन्याउनु त भएन । नेपाली सेनाले गलत काम गर्दैन । नियम, कानुनको परिधिभित्र रहेर काम गर्ने जमर्को गरेको छ । गल्ती भएका करेक्शन गर्नुपर्छ । तर आर्थिक अनियमितता हुनुहुँदैन । त्यसमा हामी असाध्यै सजग छौँ ।’

उहाँले सेनाप्रतिको आशंका अन्त्य गर्नेगरी काम गर्ने प्रतिवद्धता व्यक्त गर्नुभयो । उहाँले सेनाको कामलाई विवादित पार्न पनि नदिने बताउनु भयो । 

प्रधान सेनापति प्रभुराम शर्मा

प्रकाशित मिति: बिहिबार, पुस ५, २०८०, ८:४३ बिहान

लेखक: समाचारपाटी