काठमाडौं । त्रिभुवन आर्मीका मुकेश पाल र नेपाल पुलिसकी राजपुरा पछाईले चौंथो वीर गणेशमान सिंह १० के रोड रेसको उपाधि जित्नुभएकाे छ । 

शनिबार काठमाडौंको दरबारमार्गमा आयोजित प्रतियोगितामा पुरुषतर्फ मुकेश र महिलातर्फ राजपुरा च्याम्पियन बन्नुभएकाे हाे। मुकेशले निर्धारित दुरी ३१ मिनेट २१.७६ सेकेण्डमा पूरा गर्दै उपाधि जित्नुभएकाे हाे। 

एपीएफका गोपीचन्द्र पार्की दोस्रो स्थानमा रहनुभयाे। साविक विजेता गोपीले ३१ मिनेट ३८.६८ सेकेण्ड दौड पूरा गर्नुभयाे। तेस्रो हुनुभएका आर्मीका दीपक अधिकारीले ३१ मिनेट ४७.४२ सेकेण्डमा दौड पूरा गर्नुभयाे।

महिलातर्फ उपाधि जित्ने क्रममा राजपुराले कोर्स रेकर्डसहित ३६ मिनेट ४३.२ सेकेण्डमा दौड पूरा गर्नुभएकाे थियाे। पुलिसकै राममाया बुढाले ३७ मिनेट ५४.१५ सेकेण्डको समय निकाल्दै दोस्रो स्थान हासिल गर्नुभयाे। 

तेस्रो स्थानमा रहेकी एपीएफकी पुष्पा भण्डारीले ३८ मिनेट २६.०३ सेकेण्डमा दौड पूरा गर्नुभयाे। प्रतियोगिताको महिला र पुरुष विजेताले ६० हजार, उपविजेताले ३० हजार र तेस्रोले १५ हजार प्राप्त गरेका छन्। चौथोले १० हजार र पाँचौले ५ हजार प्राप्त गरेका छन्। कोर्स रेकर्ड बनाएका राजपुराले थप १० हजार प्राप्त गर्नुभयाे।

उपाधिमुकेश पालराजपुरा पछाई

प्रकाशित मिति: शनिबार, चैत्र ११, २०७९, ४:१३ बेलुका

लेखक: समाचारपाटी