काठमाडौं I चितवन राइनोजले नेपाल प्रिमियर लिग (एनपीएल) मा विजयी सुरुवात गरेको छ। आइतबार भएको पहिलो खेलमा चितवनले काठमाडौं गुर्खाजलाई ५ विकेटले पराजित गर्दै २ अंक हासिल गर्‍यो। काठमाडौँले दिएको ११२ रनको लक्ष्य चितवनले १७ ओभरमा ५ विकेट गुमाउँदै पूरा गर्‍यो।

चितवनका लागि सन्तोष कार्कीले ३१ बलमा २ चौका र १ छक्कासहित अविजित २८ रन बनाए। लुक बेन्केन्सटेइनले २२ र शरद भेषावकरले अविजित ११ रनको योगदान दिए। काठमाडौँका शाहब आलमले ३ विकेट लिएपनि चितवनलाई जितबाट रोक्न सकेनन्।

यसअघि, टस हारेर ब्याटिङ गरेको काठमाडौँले २० ओभरमा ९ विकेट गुमाएर १११ रन बनाएको थियो। काठमाडौँका सुमित महर्जनले २९ र माइकल लेभिटले २५ रन बनाए। चितवनका बलर सोहेल तनविरले उत्कृष्ट प्रदर्शन गर्दै ४ ओभरमा २१ रन खर्चेर ५ विकेट लिएका थिए। चितवनको यस जितसँगै टोलीले प्रतियोगितामा उत्साहजनक सुरुआत गरेको छ।

एनपीएलकाठमाडौं गुर्खाजचितवन राइनोज

प्रकाशित मिति: सोमवार, मंसिर १७, २०८१, १२:२७ बेलुका

लेखक: समाचारपाटी