धनगढी । सुदूरपश्चिम प्रदेशको मुख्यमन्त्री नेपाली कांग्रेसका कमलबहादुर शाहलाई बनाउने तयारी भएको छ । प्रदेश प्रमुखले संविधानको धारा १६८ को उपधारा (२) बमोजिम मुख्यमन्त्रीमा दाबी पेस गर्न आज आइतबार साँझ ५ बजेसम्मको समय दिनुभएकाे छ । कांग्रेसको शीर्ष तहमा भएको समझदारीअनुसार प्रदेश प्रमुखले दिएको समयभित्र शाहले मुख्यमन्त्री दाबी पेस गर्ने तयारी गर्नुभएकाे छ । कांग्रेसका एक शीर्ष नेताले दिएको जानकारीअनुसार यसअघि मुख्यमन्त्री भइसकेका शाहले लामो समय काम गर्न नपाएको भन्दै अहिले उहाँकै नेतृत्वमा सरकार गठन गर्ने समझदारी बनेको हो ।

‘राजनीतिक समीकरण फेरिएपछि छोटो अवधिमै उहाँले हट्नुपरेको थियो । त्यही कारण उहाँले चाहेअनुसार काम गर्न पाउनुभएन,’ ती नेताले भन्नुभयाे, ‘अहिले उहाँकै नेतृत्वमा सरकार गठन गर्ने समझदारी बनेको छ । बाँकी निर्णय प्रदेश संसदीय दलको बैठकले गर्छ ।’

सुदूरपश्चिमको मुख्यमन्त्रीको दौडमा प्रदेश सभा सदस्य बहादुरसिंह थापा, दिवानसिंह बिष्ट र प्रकाशबहादुर देउवा हुनुहुन्थ्याे तर उहाँहरुलाई रोक्दै पूर्वमुख्यमन्त्री समेत रहेका शाह मुख्यमन्त्रीमा दोहोरिने हुनुभएकाे हाे । पार्टी सभापति शेरबहादुर देउवाले अहिले शाहलाई मुख्यमन्त्रीमा सहयोग गर्न अन्य आकांक्षीहरुलाई निर्देशन दिनुभएकाे छ । देउवाको निर्देशनपछि उहाँका भतिजा समेत रहनुभएका प्रकाशबहादुर देउवा पनि धनगढी फर्किनुभएकाे छ ।

कांग्रेसका नेता र प्रदेश सभा सदस्यहरुले शाहलाई मुख्यमन्त्री बनाउने निर्णयमा सभापति पुगेको बताए पनि औपचारिक रुपमा धारणा दिन मान्नुभएकाे छैन् । तर, मुख्यमन्त्री शाह बन्ने पक्कापक्की भएको उहाँहरु बताउँनुहुन्छ । योसँगै कांग्रेसका शाह दोस्रोपटक सुदूरपश्चिमको पाचौं मुख्यमन्त्री बन्ने हुनुभएकाे छ । राजनीतिक समीकरण फेरिएपछि गत २२ चैतमा पदबाट राजीनामा दिएका शाहले १४ महिना प्रदेश सरकारको नेतृत्व गर्नुभएकाे थियाे ।

स्रोतकाअनुसार पार्टी सभापति देउवाले पूर्वभौतिक पूर्वाधार विकासमन्त्री समेत रहनुभएका भतिज प्रकाश देउवालाई मुख्यमन्त्री बनाउन खोज्नुभएकाे थियाे तर पत्नि आरजु देउवालाई परराष्ट्र मन्त्री बनाएका बेला भतिजालाई मुख्यमन्त्री बनाउँदा राम्रो सन्देश नजाने र परिवारवादको आरोप खेप्ने डरले शाहलाई नै दोहोर्‍याउन निर्देशन दिनुभएकाे हाे ।

शाहलाई मुख्यमन्त्री बनाउने वा नबनाउनेबारे औपचारिक निर्णय भने आज बिहान ११ बजे बस्ने संसदीय दलको बैठकले गर्नेछ ।

कमलबहादुर शाहमुख्यमन्त्रीसुदूरपश्चिम प्रदेश

प्रकाशित मिति: आइतवार, साउन २०, २०८१, ९:३५ बिहान

लेखक: समाचारपाटी