‘बारसँग मेरो कुनै विमति छैन, परिषद्को हैसियतमा पनि मेरो तपाईंहरुसँग विमति छैन':-सिंह राउत

प्रधानन्यायाधीश प्रकाशमान सिंह राउतले नेपाल बार एशोसिएशनसँग आफ्नो कुनै विमति नरहेको स्पष्ट पार्नुभएको छ ।
आईतवार बार दिवसको अवसरमा भक्तपुर जिल्ला अदालत बार एशोसिएशनले आयोजना गरेको कार्यक्रमलाई सम्बोधन गर्दै उहाँले यस्तो बताउनुभएको हो । उहाँले नेपाल बारसँग आफ्नो परिषद्को हैसियतमा पनि कुनै विमति नरहेको बताउनु भयो । उहाँले प्रधानन्यायाधीशलाई संविधानले नै निश्चित कामहरु तोकिदिएको उल्लेख गर्दै आफ्नो लागि निश्चित कर्तव्यहरु कानूनले तोकिदिएको बताउनु भयो । उहाँले बारका लागि आफूले वैधानिक तवरबाट कति सम्बोधन गर्नसकिन्छ भन्ने मात्रै प्रश्न रहेको बताउनु भयो । बारको अतित गौरवपूर्ण रहेको उल्लेख गर्दै वर्तमान कस्तो छ र वर्तमान परिवेशमा बारको भुमिका, गतिविधि, क्रियाकलाप र कामकारबाही आउने पुस्ताको लागि गौरवपूर्ण हुनसक्छ की सक्दैन भन्ने प्रश्न रहेको बताउनु भयो । यसबारे बार आफैँले वृहंगम छलफल गर्नुपर्ने बताउनु भयो ।

उहाँले भन्नुभयो, ‘बारसँग मेरो कुनै विमति छैन । परिषद्को हैसियतमा पनि मेरो तपाईंहरुसँग विमति छैन । मलाई निश्चित कामहरु संविधानले तोकिदिएको छ । मेरा निश्चित कर्तव्यहरु कानूनले तोकिदिएको छ । मैले त्यहाँनेर बार हेर्नु पर्दैन । खालि बारको कुरा के हो ? प्रश्न के हो ? जिज्ञासा के हो ? मैले वैधानिकताबाट सम्बोधन गर्नसक्ने ठाउँ कति रहेको छ ? त्यतिसम्ममा मैले के गर्ने हो ? मैले नेतृत्व तहबाट विचार गर्ने हो । म जतिखेर पनि विचार गरी नै हाल्छु । त्यसमा तपाईंहरुले सन्देह लिनै पर्दैन । मैले यसलाई ठूलो कुरा पनि मानेको छैन । यसबाट म विचलित पनि छैन । म परिसान पनि छैन । मलाई यसले डिस्टर्ब पनि गरेको छैन । बारको अतित गौरवपूर्ण छ । वर्तमान कस्तो छ, वर्तमान परिवेशमा बारको भुमिका, गतिविधि, क्रियाकलाप र कामकारबाही आउने पुस्ताको लागि गौरवपूर्ण हुनसक्ला की नसक्ला ? यसको वृहंगम छलफल तपाईंहरु आफैँ गर्नुस् । गौरवपूर्ण यसै हुँदैन है ।’

प्रधानन्यायाधीश राउतले कानून व्यवसायीहरुको पेशालाई मर्यादित र समृद्ध बनाउन आवश्यक रहेको बताउनु भयो । कानून व्यवसायीहरुले निष्ठालाई कायम राखेर मात्रै निष्पक्ष न्याय दिनसक्ने बताउनु भयो । पेशा मर्यादित नभएसम्म कानून व्यवसायीहरु सफल हुन नसक्ने बताउनु भयो । उहाँले न्यायाधीश डराए जनता डराउने र न्यायाधीशले जोखिम लिए नागरिक निश्चिन्त हुने बताउनु भयो ।

—न्युज एजेन्सी नेपाल

नेपाल बार एशोसिएशनप्रकाशमान सिंह राउत