काठमाडौं। नेपाल उद्योग वाणिज्य महासंघका अध्यक्ष चन्द्र प्रसाद ढकालले बेलायती कम्पनीहरूलाई नेपालमा जलविद्युत, पर्यटन, कृषि, सूचना प्रविधि, पूर्वाधार र उत्पादन क्षेत्रमा लगानी गर्न आग्रह गरेका छन्।

बेलायत–नेपाल चेम्बर अफ कमर्स र लण्डनस्थित नेपाली दूतावासको संयुक्त आयोजनामा लण्डनमा आयोजित विशेष कार्यक्रममा सम्बोधन गर्दै अध्यक्ष ढकालले नेपाल र बेलायतबीचको दुई सय वर्षभन्दा लामो ऐतिहासिक सम्बन्धलाई व्यापार र लगानीमार्फत थप प्रगाढ बनाउनुपर्ने बताए। कार्यक्रममा दुवै देशका व्यापारी, लगानीकर्ता र समुदाय प्रतिनिधिहरूको उल्लेख्य उपस्थिति थियो।

उनले नेपालमा प्रशस्त लगानी सम्भावना रहेको उल्लेख गर्दै जलविद्युत उत्पादनको ४० हजार मेगावाटभन्दा बढी क्षमता, स्वच्छ र हरित ऊर्जाको महत्व, युवा तथा दक्ष जनशक्ति र कम श्रम लागतका कारण नेपाल लगानीमैत्री गन्तव्य बन्दै गएको बताए।

“नेपालमा जलविद्युत, पर्यटन, कृषि, सूचना प्रविधि, पूर्वाधार र उत्पादन क्षेत्रमा आकर्षक अवसरहरू छन्। स्वच्छ ऊर्जा भविष्य हो र हामी बेलायती कम्पनीहरूलाई यी क्षेत्रमा सहकार्य गर्न आमन्त्रण गर्छौं,” अध्यक्ष ढकालले भने।

सूचना प्रविधिको क्षेत्रमा नेपाली युवाको सीप र दक्षताले नेपाललाई डिजिटल सेवाको प्रतिस्पर्धी केन्द्र बनाउन सकिने उनले बताए। साथै, लगानीकर्तालाई आवश्यक सहजीकरण र स्थिर वातावरण उपलब्ध गराउन महासंघ प्रतिबद्ध रहेको स्पष्ट पारे।

कार्यक्रममा उनले बेलायतस्थित नेपाली समुदायले दुई देशबीचको सम्बन्ध सुदृढ बनाउन खेलेको भूमिकाको प्रशंसा गर्दै नेपाली उत्पादनको बजार विस्तार, पर्यटन प्रवद्र्धनलगायत क्षेत्रमा थप योगदान दिन सकिने बताए।

आयोजक संस्थाहरूले यस्तो प्रकारको अन्तरक्रियाले नेपाल–बेलायत व्यापार र लगानी सम्बन्धलाई नयाँ उचाइमा पुर्‍याउने विश्वास व्यक्त गरेका छन्।

चन्द्र प्रसाद ढकाल

प्रकाशित मिति: शनिबार, असार २१, २०८२, ७:१६ बिहान

लेखक: समाचारपाटी