काठमाडौं I नेपाल उद्योग वाणिज्य महासंघका अध्यक्ष चन्द्रप्रसाद ढकालले आयात प्रतिस्थापन र निर्यात प्रवर्द्धनका लागि सरकारले ठोस कदम चाल्नुपर्ने आवश्यकता औंल्याउनुभएको छ। नेपाल निर्यात परिषद्को २७औं वार्षिक साधारण सभा तथा नवौं निर्यात दिवसका अवसरमा आयोजित कार्यक्रममा बोल्दै अध्यक्ष ढकालले देशको आर्थिक विकासका लागि यी दुई विषयमा गम्भीर ध्यान दिनुपर्ने बताउनुभयो।

ढकालले सरकारलाई आयात प्रतिस्थापनका लागि घरेलु उद्योगलाई मजबुत बनाउन र निर्यात प्रवर्द्धनका लागि उपयुक्त नीति तयार गरी कार्यान्वयन गर्न आग्रह गर्नुभयो। उहाँले सरकार र निजी क्षेत्रको सहकार्यबाट मात्र दीर्घकालीन आर्थिक लक्ष्य पूरा गर्न सकिने धारणा व्यक्त गर्नुभयो।

कार्यक्रममा उहाँले सरकारले व्यवसायीलाई निर्यात अनुदान समयमै उपलब्ध गराउनुपर्ने र व्यवसायीलाई उचित सम्मान दिनुपर्ने सुझाव पनि दिनुभयो। साथै, विदेशी लगानी र निर्यात प्रवर्द्धनका लागि विदेशस्थित नेपाली नियोगहरूलाई सक्रिय भूमिका खेल्न निर्देशित गर्नुपर्ने बताउनुभयो।

ढकालले नेपालले सन् २०२६ सम्ममा अल्पविकसित देशको सूचीबाट बाहिरिने तयारी गर्नुपर्ने वा थप समय माग्न पहल गर्नुपर्नेमा पनि जोड दिनुभयो।

कार्यक्रममा उद्योग वाणिज्य तथा आपूर्ति मन्त्री दामोदर भण्डारीले निजी क्षेत्रको चासोप्रति सरकार गम्भीर रहेको उल्लेख गर्दै व्यवसायीहरूलाई प्रतिष्पर्धात्मक क्षमता बढाउन आग्रह गर्नुभयो। निजी क्षेत्रका प्रतिनिधिहरूले दीगो आर्थिक विकासका लागि निर्यात प्रवर्द्धन आवश्यक रहेको बताउँदै सरकारले यसतर्फ विशेष ध्यान दिनुपर्नेमा जोड दिए।

प्रकाशित मिति: मङ्लबार, पुस २३, २०८१, १२:०० बिहान

लेखक: समाचारपाटी