'फुटबलमा नेपालको पहिलो बायोपिक चलचित्र बन्दा खुशी छु':- कप्तान किरण चेम्जोङ

नेपाली राष्ट्रिय फुटबल टिमका कप्तान किरण चेम्जोङले फुटबलमा नेपालको पहिलो बायोपिक चलचित्र बन्दा खुशी लागेको बताउनुभएको छ ।

बुधवार काठमाडौंमा चलचित्र अञ्जिलाको बारेमा आयोजित अन्तरक्रियात्मक कार्यक्रममा बोल्दै कप्तान चेम्जोङले फुटबलको क्षेत्रमा नेपालको पहिलो बायोपिक चलचित्र बन्दा खुशी लागेको बताउनुभएको हो । उहाँले अञ्जिला चलचित्र १ सय करोडमा कमाउने क्लवमा दर्ता हुनेमा विश्वस्त रहेको बताउनु भयो । चलचित्र अञ्जिलाको निर्माण टिमले आज काठमाडौंमा अन्तरक्रिया कार्यक्रम गरेको थियो । जसमा नेपाली राष्ट्रिय पुरुष फुटबल टिमका कप्तान चेम्जोङ, महिला राष्ट्रिय फुटबल टिमकी कप्तान एञ्जिला तुम्बाहाम्फो, प्रतिनिधि सभा सदस्य एवं नेकपा एमालेका सांसद सुहाङ नेम्वाङ रहनुभएको थियो । चलचित्र नेपाली राष्ट्रिय महिला फुटबल टिमकी कप्तान एञ्जिला तुम्बाहाम्फोको जीवनीमा केन्द्रित छ । कार्यक्रममा बोल्दै कप्तान एञ्जिलाले पहिलो पटक युरोपमा खेल्न जाने मौका मिलेको भन्दै खुशी व्यक्त गर्नुभयो । कार्यक्रममा बोल्दै नेकपा एमाले सांसद सुहाङ नेम्वाङले एञ्जिलाको जीवनीबाट सपनाको कुनैपनि सीमाना नहुने कुरा प्रमाणित हुने बताउनु भयो । खेलकुदको जगतमा खेलेर नै जीवन बनाउन सकिन्छ भन्नेकुरा प्रमाणित भएको बताउनु भयो । निर्देशक मिलन चाम्सले चलचित्र निकै रोचक रहेको बताउनु भयो । एञ्जिलाको संघर्ष र सफलताको कुराहरु कथामा समेटिएको र कथाले अन्य खेलाडीहरुलाई प्रेरणा मिल्ने बताउनु भयो ।

निर्देशक चाम्सले चलचित्र हेर्न जान सबै दर्शकहरुसँग आग्रह गर्नुभयो । चलचित्र अञ्जिला माघ ११ गतेबाट देशभर प्रदर्शन हुँदैछ । चलचित्रमा एञ्जिला स्वयंको मुख्य भुमिका रहेको छ भने दयाहाङ राई, मिरुना मगर, सिर्जना सुब्बा, माओत्से गुरुङ, बुद्धि तामाङ, विजय बराल, हरि खड्का लगायतको पनि अभिनय छ ।

–न्युज एजेन्सी नेपाल

कप्तान किरण चेम्जोङनेपाली राष्ट्रिय फुटबल टिम