राष्ट्रिय सभा सदस्यहरुले विभिन्न विकास निर्माणलगायतका विभिन्न विषयमा सरकारको ध्यानाकर्षण गराएका छन् । 
सोमवार बसेको राष्ट्रिय सभा बैठकमा सदस्यहरुले समसामयिक विषयमा सरकारको ध्यानाकर्षण गराएका हुन् । नेपाली काँग्रेसका सांसद कृष्णबहादुर रोकायले राष्ट्रिय गौरवको अयोजना मध्यपहाडी लोकमार्गअन्तर्गत जाजरकोटको भेरी नदीमा पुल बन्न नसकेकोप्रति सरकारको ध्यानकर्षण गराउनु भयो । उहाँले उक्त नदीमा पुल निर्माण कहिलेसम्म हुन्छ भन्ने बारे सम्बनिधत मन्त्रालयसँग जवाफ माग गर्नुभयो । उहाँले टेण्डर मागको प्रक्रिया शुरु गर्ने भनेको ६ महिना भयो भन्दै अब कहिले निर्माण प्रक्रिया शुरु हुन्छ भन्दै प्रश्न गर्नुभयो । 

उहाँले भन्नुभयो, ‘मध्यपहाडी लोकमार्ग नेपालको राष्ट्रिय गौरवको आयोजना हो । यो आयोजनाले पूर्वपश्चिमका २६ जिल्लामा यातायातको सञ्जाल बिस्तार गर्ने उद्देश्य राखेको छ । तर जाजरकोटको मन्ताबीर र रुकुम, चौरजार र कुदु जोड्ने भेरी नदीमा सडक पुल हालसम्म नबन्दा हालसम्म उक्त आयोजनाले गति लिन सकेको छैन । मध्यपहाडी पुलको टेण्डर छिट्टै हुने भनेको पनि ६ महिना बितिसकेको छ । हाल अर्थ मन्त्रालयले स्रोत सुनिश्चिताको सहमती गर्न नसकिएको भन्ने छ यसको सत्यतथ्य के हो ? के कति कारणले टेण्डर हुन सकेको छैन र कहिले हुन्छ । भौतिक पूर्वाचार तथा यातायात मन्त्रालयमार्फत जवाफका लागि जोडदार माग गर्दछु ।’

नेकपा (एकीकृत समाजवादी) का सांसद घनश्याम रिजालले नेपाल र चीन जोड्ने दोलखाको लामाबगर नाका सञ्चालनमा सरकार उदासिन देखिएको बताउनु भयो । उहाँले पर्यटनलगायत आयात र निर्यातबाट उल्लेख्य राजश्व वृद्धि हुने भएको उक्त नाका सञ्चालन र पूर्वाधार निर्माण गर्नुपर्नेमा सरकारको ध्यानाकर्षण गराउनु भयो ।  

उहाँले भन्नुभयो, ‘नेपाल र चीनबीचको पुरानो व्यापारिक नाकामध्ये दोलखा जिल्लाको लामाबगर नाका पनि एक हो । विगतमा उक्त नाकाबाट नेपाल र चीनबीच व्यापार हुने गरेको थियो । नेपालले उल्लेख्य राजश्व समेत संकलन गर्ने गरेको थियो । सोही नाका हुँदै त्रिदेशीय व्यापार गर्ने उद्देश्यका साथ २० को दशमै भन्सार अध्यागमण लगायत कार्यालयहरु स्थापना गरिएको थियो । २०५२ देखि सुरक्षाको कारण देखाउँदै उक्त नाका सञ्चालन हुन  सकेको छैन । आयात निर्यात र पर्यटनको माध्यमबाट नेपालले उल्लेख्य लाभ लिनसक्ने परिस्थिति हुँदा पनि सरकारले सरकारको उदासिनता निन्दायोग्य छ । तसर्थ ३ किलोमिटरको सडक जोड्न बाँकी रहेको नेपाल चीन र भारत जोड्न नाका जोड्नक लागि सरकारको ध्यानाकर्षण गराउँछु ।’

नेपाली काँग्रेसकी सांसद विष्णुकुमारी सापकोटाले काठमाडौं–नारायणढ बुटवलको सडक निर्माणमा भइरहेको ढिलासुस्तीका बारेमा सरकारको न्यानाकर्षण गराउनु भयो । उहाँले निर्माणका लगि सबै ठाउँमा एकैपटक सडक भत्काएर सडक अवरुद्ध हुँदा यात्रुले सास्ती भोग्ने परेको बताउनु भयो । उहाँले पटकपटक म्याद थप्दा पनि सडक निर्माण सम्पन्न हुन नसक्नुको कारण सरकारसँग माग गर्नुभयो । 

उहाँले भन्नुभयो, ‘काठमाडौं नारायणघाट बुटवलको सडक लामो समयदेखि अवरुद्ध हुँदा धेरै नागरिकले सास्ति भोग्नुपरेको छ । नारायणघाट बुटवल दूरी जम्मा दुई तीन घण्टाको हो । तर अहिले १५ देखि २० घण्टा लाग्ने गरेको छ । चाइनिज कम्पनीले निर्माण गर्ने जिम्मा लिएको यो सडक दुई पटक म्याद थप्ता पनि निर्माण पूरा हुन नसक्नुको कारण के हो ? 

नेकपा (माओवादी केन्द्र) का सांसद विष्णुबहादुर विश्वकर्माले चैत १५ को घटनाका पूर्वराजा ज्ञानेन्द्र शाहलाई सरकारले तत्काल पक्राउ गरी छानबिन गर्न सरकारको ध्यानाकर्षण गराउनु भयो । उक्त घटनाका सहायक कमाण्डरहरु जेल भएपनि मुख्य कमाण्डर शाहलाई सरकारले पक्राउ गर्न नसकेको उहाँको भनाइ छ । दरबार हत्याकाण्डका समेत योजनाकार समेत शाह भएको भन्दै सरकारले गिरफ्तार गरी सम्पती छानबिन गर्नुपर्ने उहाँको भनाइ छ ।

उहाँले भन्नुभयो, ‘चैत्र १५ गने भएको वितण्डाले देश मर्माहित भएको छ । त्यसको सहायक कमाण्डर गिरफ्तार गरिएका छन्, सहायक कमाण्डर जेलमा छन् तर मुख्य कमाण्डर समातिएका छैन । मुख्य कमाण्डर भनेका प्रतिगमणका मुख्य नायक ज्ञानेन्द्र शाह हुन् । ज्ञानेन्द्र शाहलाई  अहिले पनि सकारले समाउन सकेको छैन । दरबार हत्याकाण्डका मुख्या योजनाकार पनि तिनै हुन भन्ने सर्वत्र चर्चा छ । ज्ञानेन्द्र शाहलाई गिरफ्तार गरियोस् र सम्पत्तिको पनि छानबिन होस् ।’राष्ट्रिय सभा सदस्यहरुले आर्थिक अनियमितता भ्रष्टाचारका उजुरी तथा राष्ट्रिय गौरवका आयोजनाहरुको कामकारबाहीबारे सरकारको ध्यानाकर्षण गराएको थिए ।

–न्युज एजेन्सी नेपाल

ध्यानाकर्षणविष्णुबहादुर विश्वकर्मा

प्रकाशित मिति: मङ्लबार, बैशाख २३, २०८२, ८:१८ बिहान

लेखक: समाचारपाटी