काठमाडौं। पाकिस्तानमा जारी ब्लाइण्ड क्रिकेट टी२० विश्वकपमा सहभागी नेपाली टोलीका बागमती प्रदेशका खेलाडीहरूलाई बागमती प्रदेश खेलकुद विकास परिषदले नगद पुरस्कार दिने घोषणा गरेको छ।

परिषदका सदस्य सचिव दीपक लामाले विश्वकपमा उच्च प्रदर्शन गर्ने बागमती प्रदेशका चार खेलाडीलाई जनही २० हजार नगद पुरस्कार प्रदान गर्ने जानकारी दिए। विश्वकपमा बागमती प्रदेशबाट सागर लामा, प्रवीण स्याङ्तान, अमिस गुरागाईं, र सन्त पहारी सहभागी भएका छन्।

नेपाली टोलीले यसपटकको विश्वकपमा ऐतिहासिक सफलता हात पार्दै पहिलो पटक सेमिफाइनल पुग्न सफल भएको थियो। ६ टोली सहभागी प्रतियोगितामा नेपालले चौथो स्थान हासिल गरेको हो।

सदस्य सचिव लामाले भने, "दृष्टिविहीन खेलाडीहरूले उत्कृष्ट प्रदर्शन गर्दै खेलमा आफ्नो क्षमताको प्रमाण दिएका छन्। उहाँहरूको यो उपलब्धिलाई सम्मान गर्न हामीले सानो योगदान स्वरूप नगद पुरस्कार प्रदान गर्न लागेको हौं।"

लिग चरणमा नेपालले अफगानिस्तान र दक्षिण अफ्रिकालाई पराजित गर्दै उत्कृष्ट प्रदर्शन गरेको थियो। तर श्रीलंका, बंगलादेश, र पाकिस्तानसँग पराजित भएको थियो। सेमिफाइनलमा पनि नेपाल पाकिस्तानसँग पराजित भई फाइनल यात्रा रोकिएको हो।

नेपाली टोलीको यस ऐतिहासिक प्रदर्शनले देशकै गर्व बढाएको र दृष्टिविहीन खेलाडीहरूका लागि थप अवसर र प्रोत्साहनको बाटो खोल्ने अपेक्षा गरिएको छ।

टी२० विश्वकपब्लाइण्ड क्रिकेट विश्वकप

प्रकाशित मिति: आइतवार, मंसिर १६, २०८१, ४:२२ बेलुका

लेखक: समाचारपाटी