बागलुङ । बागलुङमा माछा मार्ने क्रममा खोलाले बगाउँदा एक युवा बेपत्ता भएका छन्। शुक्रबार बिहान गलकोट नगरपालिका-६ मजुवा स्थित दरमखोलामा माछा मार्ने क्रममा एक युवालाई खोलाले बगाएको जिल्ला प्रहरी कार्यालय बागलुङले जनाएको छ।

गलकोट नगरपालिका–१० घर भइ वडा नम्बर ६ मजुवा बस्ने ४२ वर्षीय रमेश परियारलाई खोलाले बगाएको जिल्ला प्रहरी कार्यालय बागलुङ बागलुङका प्रहरी नायब उपरीक्षक (डिएसपि) विजय यादवले जानकारी दिनुभयाे।

रमेश परियारका दाजुभाइ शुक्रबार बिहानै दरमखोलामा माछा मार्न गएका र दाइ रमेशलाई खोलाले बगाएपछि भाइ मनोज परियारले इलाका प्रहरी कार्यालय हरिचौरमा जानकारी गराउनुभएकाे थियाे।

बेपत्ता युवाको प्रहरी र स्थानीयले खोजी गरिरहेका छन्। घटनास्थलमा रहेका प्रहरी नायव निरीक्षक तोरणध्वज पौडेलले बिहिबार रातभरि पानी परेकोले खोलाको बहावसमेत बढेको कारण खोजी कार्यमा कठिनाइ भएको बताउनुभयाे।

बागलुङबेपत्ता

प्रकाशित मिति: शुक्रबार, साउन ३२, २०८१, १०:१५ बिहान

लेखक: समाचारपाटी