चितवन । दुर्लभ एकसिंगे गैंडा संरक्षणका लागि चितवनमा सम्मेलन सुरु भएको छ। पाँच एसियाली राष्ट्रको सम्मेलन चितवनको पटिहानीमा सुरु भएको हो। 

तीन दिनसम्म चल्ने  सम्मेलनमा नेपालसहित भारत, भुटान, इन्डोनेसिया र मलेसियाका उच्च अधिकारी बैठकमा सहभागी हुनेछन्। प्राकृतिक संरक्षणमा लागेका विज्ञहरूले कार्यपत्र र अनुभव साट्नेछन्। आ–आफ्नो देशमा गैंडा संरक्षणका क्षेत्रमा भएका प्रगतिहरू प्रस्तुत गर्नेछन्। उनीहरूले आफ्नो देशमा भएका कामका बारेमा कार्यपत्र प्रस्तुत गर्नेछन्। यसअघि पहिलो बैठक इन्डोनेसिया र दोस्रो बैठक भारतको दिल्लीमा भएको थियो। 

बैठकमा भेनेजुएयला, संयुक्त अरब इमिरेट्स, केन्या, दक्षिण अफ्रिकालगायतका देशका संरक्षणकर्मीहरू छन्। गैंडा संरक्षणमा देखिएका चुनौती र भावी योजनाको विषयमा छलफल केन्द्रित हुनेछ। राष्ट्रिय निकुञ्ज तथा वन्यजन्तु संरक्षण विभागका महानिर्देशक डा. महेश्वर ढकालले गैंडा संरक्षणमा देखिएका चुनौतीहरूका विषयमा बृहत् छलफल गरी आगामी योजनाहरू तय गरिने बताउनुभयाे। ‘यो तेस्रो सम्मेलन भएकोले अघिल्लो सम्मेलनको निर्णयको मूल्यांकन गर्दै थप रणनीति बनाउनेछ,’ उहाँले भन्नुभयाे, ‘सम्मेलनले सबै पक्षमा छलफल गरेर भविष्यमा कस्तो नीति लिने भन्ने निर्णय हुन्छ। एकसिंगे गैंडाको दोस्रो ठूलो बासस्थान नेपाल हो।  

नेपालका तर्फबाट वातावरणमा आएको परिवर्तनले वन्यजन्तु र बासस्थानमा परेको असर र गैंडा संरक्षणमा भएका कामसँगै शून्य चोरी सिकारी नियन्त्रणका विषयमा कार्यपत्र प्रस्तुत गरिने बताइएको छ।

एसियाली सम्मेलनगैंडा संरक्षण

प्रकाशित मिति: शनिबार, माघ २१, २०७९, १२:१९ बेलुका

लेखक: समाचारपाटी