परासी । हत्या गरेर फरार रहेका अभियुक्तलाई प्रहरीले पक्राउ गरेको छ । नवलपरासी बर्दघाट नगरपालिका ४ को एक खाजा पसलमा पुगेर दुई जनामाथि खुकुरी प्रहार गर्ने अभियुक्तलाई प्रहरीले बुधबार बिहान पक्राउ गरेको हो ।
खुकुरी प्रहार गरेकामध्ये एक जनाको मृत्यु भएको छ । अर्काको अवस्था चिन्ताजनक छ । पक्राउ पर्नेमा बर्दघाट नगरपालिका २ का ५० वर्षीय ज्ञानेन्द्रबहादुर राना रहेको जिल्ला प्रहरी कार्यालयका सूचना अधिकारी डिएसपी भोजराज पाण्डेले बताउनुभयाे ।
मंगलबार राति करिब ९ बजेको समयमा खाजा पसलमा पुगेका अभियुक्त रानाले पसलधनी ४२ वर्षिय विष्णु कुमारी काउछा र कोठामा बसेका ४६ वर्षीय दीलिपकुमार पुनमाथि एकाएक खुकुरी प्रहार गरेका थिए ।
दुबै जनालाई टाउमा खुकुरी प्रहार गरिएको थियो । खुकुरी प्रहारबाट गंभिर भएका पुनको उपचारका क्रममा मंगलबार राति मृत्यु भएको छ । मृतक बडीघाट गाउँपालिका–४, बाग्लुङका रहेकाे प्रहरीले बताएकाे छ। चिन्ताजनक अवस्थामा भैरहवा मेडिकल कलेजमा उपचार भइरहेकी विष्णु पनि बडीघाटबाट बर्दघाट आएकी र विष्णुका श्रीमान भने बाग्लुङमै रहेकाे प्रहरीले बताएकाे हाे ।
दुई छोराहरु कोरिया र रोमानियामा कामको शिलशिलामा छन् । विगत ४ र ५ वर्षदेखि विष्णुले एक्लै बर्दघाटमा खाजा पसल सञ्चालन गर्दै आएको प्रहरीले जनाएको छ । मृतक पुन र विष्णुबीच नाता दाजुबहिनी रहेको प्रहरीले जनाएको छ।