विराटनगर । विराटनगर महानगरपालिका–५ का २८ वर्षीय रोहित चौधरीको गोली हानेर हत्या गरिएको घटनामा संलग्न थप दुईजना पक्राउ परेका छन् ।  प्रहरीले यस घटनामा प्रयोग गरिएको हतियार (पेस्तोल) ‘सप्लाइ’ गर्नेदेखि हत्यामा संलग्न रहेका चारजनालाई हालसम्म पक्राउ गरिसकेको छ । 

सुनसरी प्रहरीका प्रवक्ता डीएसपी राजकुमार राईले हत्याकाण्डको अनुसन्धानका क्रममा धरान र विराटनगरबाट थप दुईजनालाई बिहीबार पक्राउ गरिएको जनाकारी दिनुभयाे । पक्राउ पर्नेमा झापाको भद्रपुर नगरपालिका–१ पृथ्वीनगर घर भइ सुनसरीको धरान उपमहानगरपालिका–८ भोटेपुल बस्दै आएका ३० वर्षीय प्रकाश लिम्बू र विराटनगर महानगरपालिका–१५ जनपथ टोलका ४१ वर्षीय अज्जु भनिने अजयकुमार शर्मा रहेको राईले बताउनुभयाे । 

उहाँका अनुसार हत्यामा लिम्बूको प्रत्यक्ष संलग्नता छ । घटनामा प्रयोग गरिएको पेस्तोल शर्माले हत्यामा संलग्न गिरोहलाई उपलब्ध गराएको प्रारम्भिक अनुसन्धानबाट खुलेको डीएसपी राईले बताउनुभयाे । चौधरीको हत्यामा संलग्न मोरङको लेटाङ नगरपालिका–१ का ३५ वर्षीय दीपक तिम्सिना र सुनसरीको धरान– १० का ३४ वर्षीय अनसन तामाङ यसअघि पक्राउ परिसकेका छन् । 

कोसी प्रदेश प्रहरी प्रमुख डीआईजी राजेशनाथ बास्तोलाले गत बुधबार विराटनगरस्थित प्रदेश प्रहरी कार्यालयमा पत्रकार सम्मेलनको आयोजना गरेर तिम्सिना र तामाङलाई सार्वजनिक गर्नुभएकाे थियाे । डीआईजी बास्तोलाका अनुसार हत्यामा प्रयोग गरिएको पेस्तोल र ७ राउन्ड गोलीसहित तिम्सिना र तामाङलाई पक्राउ गरिएको हो ।  

चौधरीको गत साउन ५ गते धरानको सेउती पुलनजिकै गोली हानेर हत्या गरिएको हो । २८ औं जन्मदिन मनाउने क्रममा घुमघामका लागि धनकुटाको मुलघाटसम्म पुगेर विराटनगरस्थित घर फर्कने क्रममा लुटेरा समूहले चारकोसे जंगलको बीचमा चौधरीमाथि गोली हानेको थियो । 

गम्भीर घाइते चौधरीलाई बीपी कोइराला स्वास्थ्य विज्ञान प्रतिष्ठान धरान पुर्‍याउनसाथ चिकित्सकले मृत घोषित गरेका हुन् । सुनसरी प्रहरी प्रमुख एसपी प्रभुप्रसाद ढकालका अनुसार घुमफिर सकेर विराटनगर फर्किने क्रममा चौधरी र साथमा रहेकी युवती सेउती पुलनजिकै जंगलमा रोकिएका थिए । ‘सोही क्रममा लुटेरा समूहले युवतीले लगाएको सिक्री र पैसा लुटपाट गर्न खोज्यो,’उहाँले भन्नुभयाे,‘चौधरीले प्रतिकार गरेपछि उनीमाथि गोली प्रहार गरिएको खुलेको छ ।’ 
 

annapurnapost 

पक्राउहत्या

प्रकाशित मिति: शुक्रबार, साउन १९, २०८०, १:३१ बेलुका

लेखक: समाचारपाटी