काठमाडौं I नेपाल उद्योग वाणिज्य महासंघका अध्यक्ष चन्द्रप्रसाद ढकालले लगानीमैत्री वातावरणका लागि केही कानुन संशोधन आवश्यक रहेको बताएका छन्। बिहीबार काठमाडौंमा आयोजित ‘प्लाष्ट नेपाल २०२४’को उद्घाटन समारोहमा बोल्दै उनले गत वैशाखको लगानी सम्मेलनपछि कानुन संशोधन भए पनि नियमावली र कार्यविधि तयार नभएकाले कार्यान्वयनमा चुनौती रहेको बताए।

ढकालले निजी क्षेत्रका अन्त:शुल्क, उत्पादनका समस्या र मूल्य निर्धारणका विषयलाई समयमै समाधान गर्न सरकारलाई आग्रह गरे। “सरकार र निजी क्षेत्रको सहकार्यमा लगानी सम्मेलन सम्पन्न भयो। कानुन संशोधन भए पनि कार्यान्वयनमा ढिलाइ भएको छ। अझै केही कानुन परिवर्तन गर्न आवश्यक छ,” उनले भने।

ढकालले वर्तमान सरकारले व्यवसायीसँग छलफल गरी काम गरिरहेको प्रयासको स्वागत गर्दै उच्चस्तरीय आर्थिक सुधार आयोग गठन भएकोमा धन्यवाद व्यक्त गरे। उनले व्यवसायीहरूलाई लगानी प्रभावित गर्ने कानुनबारे सुझाव दिन पनि आग्रह गरे।

समस्याहरू समाधान गर्न सके छोटो समयमा आर्थिक सुधार सम्भव हुने विश्वास व्यक्त गर्दै उनले सरकार र निजी क्षेत्रको सहकार्यलाई अझ प्रभावकारी बनाउन सुझाव दिए।

प्रकाशित मिति: शुक्रबार, मंसिर १४, २०८१, ११:४१ बिहान

लेखक: समाचारपाटी