काठमाडौं । नेपाल प्रहरीका प्रहरी अतिरिक्त महानिरीक्षक (एआईजी)हरुको सरुवा भएको छ। पछिल्लो पटक बसेको मन्त्रीपरिषदको बैठकले पाँचजना एआईजीको सरुवा गरेको हो। 

उपत्यका प्रहरी कार्यालय, रानीपोखरीका प्रमुख श्यामलाल ज्ञवालीसहितका एआईजीहरु सरुवा भएका छन्। गृहमन्त्रालय श्रोतका अनुसार सरकारलाई जरुरी लागेर जिम्मेवारी हेरफेर गरिएको हो।

उपत्यका प्रहरी प्रमुखमा प्रशासन विभागका प्रमुख दिपक थापाको सरुवा भएको छ। ज्ञवालीको उपत्यका प्रहरी कार्यालयमा पदस्थापना भएको साढे ४ महिना मात्र भएको थियो। उहाँको ठाउँमा  एआईजी दिपक थापालाई ल्याइएको  छ।  

प्रशासनमा एआईजी मिरा चौधरीको सरुवा भएको छ। चौधरी कार्य विभागमा कार्यरत हुनुहुन्थ्याे। मिराको ठाउँमा श्यामलाल ज्ञवालीलाई पठाइएको छ। राष्ट्रिय प्रहरी प्रशिक्षण प्रतिष्ठानका प्रमुख एआईजी टेकप्रसाद राईको मानवस्रोत विभागमा सरुवा भएको छ। मानवस्रोतका प्रमुख सन्दीप भण्डारी राईको स्थानमा पठाइएका छन्।

साढे ४ महिनामै एआईजीको सरुवा गरिएपछि चौतर्फी आलोचना बढिरहेको छ। प्रहरी नियमावलीमा  एआईजी सरुवा एक वर्षमा मात्रै गरिने व्यवस्था छ। नेपाल प्रहरीको प्रवक्ता कुबेर कठायतले सरुवाको विषयमा जानकारी नभएको बताउनुभयाे।

एआईजीनेपाल प्रहरी

प्रकाशित मिति: शनिबार, भदौ २, २०८०, १२:०४ बेलुका

लेखक: समाचारपाटी