सिन्धुपाल्चोक । दोलखाबाट काठमाडौं गइरहेको बा ४ ख १९३३ नम्बरको यात्रुवाहक बस शुक्रबार बलेफी गाउँपालिकाको खाडीचौर बजारमा दुर्घटना हुँदा ८ जना घाइते भएका छन्। अरनिको यातायातले सञ्चालन गरेको यात्रुवाहक बसको ब्रेक फेल हुँदा गाडी अनियन्त्रित भई पसलमा ठोक्किएको थियो। जसका कारण दुई पसमा क्षति समेत पुगेको छ। इलाका प्रहरी बाह्रबिसेका प्रहरी निरीक्षक मुकेश न्यौपानेका अनुसार घाइते सबैलाई उपचारका लागि सिन्धु सदाबहार अस्पताल लगिएको छ।

बसमा १२ जनाभन्दा बढी यात्रु सवार थिए। अनियन्त्रित भएको बस खाडीचौर पुलबाट कपडा पसलमा गएर ठोकिएको थियो। स्थानीय प्रत्यक्षदर्शी मिलन सुवेदीले घटना भएलगत्तै स्थानीयले घाइतेलाई तत्काल स्थानीय अस्पताल पुर्‍याएको बताउनुभयाे। 'बस ठोकिएको आवाज आएपछि हामी त्यहाँ पुग्यौं', सुवेदीले भन्नुभयाे– ' यदि बस पसलमा नठोकिएको भए ठूलै दुर्घटना हुने देखिन्छ।’ 

दुर्घटनामा घाइते भएका बसका चालक, बस ठोक्किएको पसलका सञ्चालकसहित ८ जना घाइतेको अवस्था अहिले सामान्य रहेको प्रहरीले जनाएको छ। ‘घाइतेहरूको अवस्था सामान्य छ, दुर्घटनाको बारे हामी अनुसन्धान गरिरहेका छौं’, प्रहरी निरीक्षक न्यौपानेले भन्नुभयाे – ‘प्रारम्भिक अनुसन्धानमा बस ब्रेक फेल भई दुर्घटना भएको देखिन्छ।’

annapurnapost
 

घाइतेदुर्घटना

प्रकाशित मिति: शुक्रबार, साउन २६, २०८०, ३:३५ बेलुका

लेखक: समाचारपाटी