काठमाडौं । सञ्चार तथा सूचना प्रविधि मन्त्री रेखा शर्माले फोर–जी सेवा गुणस्तर बनाएर आवश्यक पूर्वाधारको निर्माणपछि मात्रै फाइभ–जी लागू गर्न उपयुक्त हुने बताउनुभएको छ ।

बिहीवार प्रविधि पत्रकार मञ्चले काठमाडौंमा आयोजना गरेको फाइभ जी को चुनौती र आगामी बाटोु नामक अन्तरक्रिया कार्यक्रममा बोल्दै मन्त्री शर्माले यस्तो बताउनुभएको हो ।

उहाँले देशमा फाइभ जी सेवा परीक्षण गर्दै गर्दा देशका धेरै ठाउँमा सामान्य सूचनाको पहुँचसमेत पुग्न नसकेको अवस्था रहेको बताउनुभयो ।

उहाँले फोर जी सेवा विस्तार भएको लामो समयसम्म काठमाडौं उपत्यकामा समेत प्रभावकारी हुन नसकेको भन्दै फोर जी सेवालाई व्यवस्थित बनाउन आवश्यक रहेको बताउनुभयो ।

फोर जी सेवा लागू गर्दा लागेको लागतअनुसार प्रतिफल भए र नभएको विषयमा अध्ययन गर्नुपर्ने उहाँले उल्लेख गर्नुभयो ।

उहाँले भन्नुभयो, ‘नेपालमा फाइभ जी लागू हुँदा धेरै लाभ लिन सकिने भएकाले लागू गर्न आवश्यक छ । हामीले फोर जीको अवस्था थाहा नपाई फाइभ जीमा कसरी अगाडि बढ्ने विषय छ ।

फोरजी सेवामा कति लागत लगायौँ र कति लागत उठ्यो भन्ने वास्तविक लेखाजोखा नगरि विश्वमा आउने नयाँ प्रविधिमा अगाडि बढ्दै जाने र त्यसबाट के भयो भन्ने विषयमा समीक्षा गर्न सकेनौँ भने लाभभन्दा पनि नोक्सान हुनेजस्तो लाग्छ ।

हामी फोर जीमा भौगोलिकरूपमा कठिन अवस्थामा छौँ । गाउँपालिकाको कार्यालयमा फोन लाग्दैन, फोर जीको विषय टाढाको कुरा हो ।’

सञ्चारमन्त्री

प्रकाशित मिति: बिहिबार, फाल्गुन ११, २०७९, २:४८ बेलुका

लेखक: समाचारपाटी