काठमाडौं । अनेरास्ववियुको केन्द्रीय अध्यक्षमा समिक बडाल विजयी हुनुभएकाे छ। अनेरास्ववियूको २३ औं राष्ट्रिय महाधिवेशनबाट अध्यक्षमा बडाल निर्वाचित हुनुभएको निर्वाचन समितिले घोषणा गरेको छ।
बडाल निवर्तमान महासचिव हुनुहुन्छ। बडालले ९ सय ६२ मत प्राप्त गर्दा उहाँका निकटतम् प्रतिद्वन्द्वी आरसी लामिछानेले ३ सय ५६ मत प्राप्त गर्नुभएकाे छ ।
महासचिवमा नरेश रोकाया विजयी हुनुभएकाे छ। उहाँले ७ सय ३३ मत प्राप्त गर्नुभएकाे छ। रोकायाका निकटतम् प्रतिद्वन्द्वी भाष्कर खनालले ३सय २२ मत प्राप्त गर्नुभएकाे थियाे।
निर्वाचन समितिका अनुसार उपाध्यक्षमा गोविन्द गिरी, धर्म गिरी, नारायण घर्ती र मर्यादा विष्ट विजयी हुनुभएकाे छ। यसैगरी सचिवमा डा. सुजन कडरिया, अन्जना शिवाकोटी, आरती भट्टराई, दीपेश प्रसाईं, प्रकाश पौडेल, विनिता काफ्ले, सन्जीव धिताल, दीपक धामी, आशिर्वाद सुवेदी र मनोज ताम्ली लिम्बु निर्वाचित हुनुभएकाे छ । कोषाध्यक्षमा संगम अर्याल विजयी हुनुभएकाे छ।
नेकपा एमाले निकट विद्यार्थी संगठन अखिलले सहमतिमा नेतृत्व चयनको प्रयास गरेपनि असफल भएपछि बिहीबार बेलुकाबाट विद्युतीय मेसिनमार्फत मतदान गरेर नेतृत्व चयन गरेको हो। निर्वाचनमा १ हजार ५ सय १७ मत खसेको निर्वाचन समितिले जनाएको छ।